Ես չեմ հիշում, որ նախկինում ուժային կառույցների ղեկավարների մասնակցությամբ ԱԺ-ում նման լայն քննարկում եղած լինի: Այս մասին, այսօր՝ հոկտեմբերի 16-ին, ԱԺ-ում լրագրողների հետ զրույցում նշեց ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը՝ անդրադառնալով նախօրեին տեղի ունեցած քննարկմանը:
Նա նկատեց, որ ի պատիվ ուժային կայույցներին, բերվել էին շատ պատրաստված զեկույցներ կատարված աշխատանքի, թերացումների եւ դրանց հաղթահարման ուղիների հետ կապված:
Քոչարյանը դժգոհեց, որ լրատվամիջոցներն առանձնացրել են այդ քննարկման ժամանակ տեղի ունեցած միջադեպը ՔՊ-ական պատգամավոր Հովիկ Աղազարյանի եւ ՔԿ նախագահ Արգիշտի Քյարամյանի միջեւ:
«Ես կարողացա այնպես կառավարել, որպեսզի ոչ թե չխորանա հակասությունը, այլեւ մտնենք բովանդակային փուլ»,-ասաց նա:
Հարցին՝ ինչպե՞ս է գնահատում երեկ Արգիշտի Քյարամյանի վարքը, նա պատասխանեց. «Ես կարծում եմ, որ ցանկացած պաշտոնյա պետք է լինի շատ զուսպ: ԱԺ-ն ամենաբարձր ներկայացուցչական մարմինն է: ԱԺ-ն հենց խոսելու տեղ է, որտեղ պետք է խոսել, լսել, բայց այնպես անել, որ անձնական հակադրությունների դաշտ չմտնենք»:
Նա հավելեց, որ ՔՊ խմբակցությունը դեռ չի քննարկել Քյարամյանի վարքը, բայց վստահություն հայտնեց, որ խմբակցությունն այս հարցերին անպայման անդրադարձ կունենա. «Ես չեմ կարող ասել՝ հետեւանք կունենա, թե ոչ: Եթե դուք նայեք օրենքները, կտեսնեք, թե քննարկումների հետ կապված ինչ քննարկումներ կարող են լինել եւ որոշումները որտեղ են կայացվում»:
Ճշտող հարցին՝ դատապարտելի՞ է համարում Արգիշտի Քյարամյանի վարքը, Անդրանիկ Քոչարյանը պատասխանեց. «Ընդհանրապես, նման կառույցի ղեկավարները բոլորը, հատկապես ուժայինները բարեվարքությունը պետք է պահեն: Վերջին հաշվով Աղազարյանը նաեւ տարիքով է մեծ: Դա նույն Աղազարյանն է, որ առավոտից իրիկուն մեզ էլ անհարմար վիճակների մեջ է դնում: Էդպես որ լիներ, բոլորս պետք է դանակը վերցնեինք, Աղազարյանին դանակահարեինք: Այդպես չի լինում: Պատգամավորն իր կարծիքն է հայտնել, երբեք չի կարելի պատգամավորին ենթարկել ճնշման իր տղայի հետ կապված քրեական ինչ-որ հոդվածների լեզվով: Դա չի կարելի:
Քյրամյանն առաջին անգամ էր գալիս նման լսումների, սա իր դեբյուտն էր, կարծում եմ՝ հաջորդ անգամ ավելի պատրաստ կլինի ԱԺ-ում շփումներին»:
Հարցին՝ հրաժարականի հիմքեր չի՞ տեսնում, եւ հնարավո՞ր է ստորագրահավաք սկսեն Քյարամյանի հրաժարականի պահանջով, նա պատասխանեց. «Հրաժարականների թեման ես չեմ: Ի՞նչ ստորագրահավաք: Այսինքն դուք ստորագրահավաքները դիտարկում եք որպես խարդավա՞նք: Ես չգիտեմ՝ որեւէ մեկը ստորագրահավաք նախաձեռնել է, թե ոչ: Բայց դրա կարիքը գուցե չկա էլ: Կոնֆլիկտի կողմերը կարող է գիտակցեն, որ սխալ բան է եղել:
Հիշեցնենք, որ երեկ՝ հոկտեմբերի 15-ին, ԱԺ-ում ուժայինների մասնակցությամբ լսումների ժամանակ իրավիճակը շիկացավ, բխվեցին ՔՊ-ական պատգամավոր Հովիկ Աղազարյանն ու ՔԿ նախագահ Արգիշտի Քյարամյանը: Հովիկ Աղազարյանն իր ելույթում հայտարարեց, որ կալանքը կիրառվում է որպես ճնշման միջոց, նաեւ քննադատեց ՔԿ-ի եւ նրա նախագահ Արգիշտի Քյարամյանի աշխատանքը:
Արգիշտի Քյարամյանն արձագանքեց. «Էս երկրի երեսին մեկը չկա, ով կկարողանա իմ ասածների վերաբերյալ ռեպլիկ բաց թողնել, եւ եթե եղել է այդպիսին, ուրեմն ես հլը շատ մեղմ արձագանք եմ ցուցաբերել, արձագանքը հետագայում կզգացվի»:
Նիստը վարող Անդրանիկ Քոչարյանն արձագանքեց. «Դուք ԱԺ-ում եք եւ այդ տղայական խոսակցությունը էստեղ չի անցում»:
Քյարամյանն էլ ասաց. «Տղայական չի, հանկարծ չորակեք իմ խոսակցությունը: Տղայականը ազդարարման համակարգին «գործ տալ» ասելն է»: Նա դիմեց Աղազարյանին՝ ասելով. «Խնդրում եմ՝ մեկնաբանեք, թե ինչո՞վ է պայմանավորված, որ առնվազն երկու անգամ ինձ դիմել են ձեր տղայի հետ կապված քրեական գործով մեքենաները հենց նույն էդպիսի վարույթներով հետ վերադարձնելու վերաբերյալ»:
Աղազարյանն էլ բորբոքված արձագանքեց. «Պարոն Քյարամյան, ես չասացի՝ ինչու դուք իմ տղայի հետ կապված քրեական գործը չեք հասցնում մինչեւ վերջ, միգուցե պահում եք, որ հետո նվիրեք պարոն Լեւոն Քոչարյանի՞ն:
Ես իմ տղային հրահանգել եմ, որ ինքը ոչ մի կոմպրոմիսի չգնա եւ թող գործը գնա դատարան: Հետեւաբար, դուք, պարոն Քյարամյան, դուք ապացուցում եք իմ անհանգստությունը, որ դուք ճնշման միջոց եք օգտագործում կալանքը: Ի՞նչ է նշանակում՝ չկա մեկը, որ ինձ դիտողություն անի: Ձեր թաղը չի էստեղ, էստեղ ԱԺ է: Ի՞նչ է նշանակում՝ չկա մեկը, որ ինձ դիտողություն անի»:
Աղազարյանը նաեւ «արա»-ով դիմեց Քյարամյանին, ինչն վերջինս արձագանքեց. «Ոտքից գլուխ «արա» ես»:
Հատկանշական է, որ Աղազարյանն ու Քյարամյանը նստած էին կողք կողքի եւ մթնոլորտն այնքան շիկացավ, որ հնչեցին վիրավորանքներ և Հակակոռուպցիոն կոմիտեի նախագահ Սասուն Խաչատրյանը ստիպված էր մոտենալ ու հեռու տանել Քյարամյանին, որ բանը չհասնի բռունցքների:
Նշենք, որ Քննչական կոմիտեի նախագահը թեժ վեճի պահին Հովիկ Աղազարյանին հարցրել էր. «Խնդրում եմ նաև մեկնաբանել, թե ինչո՞վ է պայմանավորված, որ առնվազն երկու անգամ ինձ դիմել են Ձեր տղայի հետ կապված քրեական գործով»։
Հիշեցնենք՝ տեղեկություն է շրջանառվում այն մասին, որ պատգամավոր Հովիկ Աղազարյանի դեմ Հակակոռուպցիոն կոմիտեում ցուցմունք են տվել, համաձայն որի՝ նա 300 հազար ԱՄՆ դոլար կաշառք է ուզել, որ Հայաստանից, սահմանված ընթացակարգերի խախտմամբ, առանց խոչընդոտների, մանր եղջերավոր անասուններ արտահանեն Արաբական Միացյալ Էմիրություններ։ Նշվում է, որ չի բացառվում, որ այս գործով ՀՀ գլխավոր դատախազ Աննա Վարդապետյանը մտնի ԱԺ և Աղազարյանին պատգամավորական անձեռնմխելիությունից զրկի: