44-օրյա պատերազմի ժամանակ Վազգեն Մանուկյանը կոչ արեց պաշտպանության կոմիտե ստեղծել Արցախի պաշտպանությունն արդյունավետ կազմակերպելու համար։ Իշխանության ամբողջ քարոզչական ռեսուրսը հարձակվեց նրա վրա, մարդուն հանեցին ազգի դավաճան և պառակտող։
Ընդամենը մի քանի շաբաթ անց պատմությունը ցույց տվեց, որ Վազգեն Մանուկյանը ճիշտ էր, իսկ իշխանություններն, ըստ էության, դավաճանական խաղ էին վարում հօգուտ Ադրբեջանի։
Հայաստանի պաշտպանության համար ազգային ուժերի միավորվելու ու միասնական ճակատով հանդես գալու պահը, իհարկե, նոր չի հասունացել (այն դեռ 2018-ի աշնանն էր հասունացել), բայց այսօր կշեռքի նժարին Հայաստանի լինել-չլինելու հարցն է։
Թշնամու գործողություններն այսօր ուղղված են Սյունիքը ՀՀ-ից կտրելուն, իսկ ամեն կորցրած օրը՝ հօգուտ Հայաստանի թշնամիներին է։
Կոչ եմ անում ազգային / պետական դիրքերից հանդես եկող քաղաքական ուժերի առաջնորդներին մի կողմ դնել ներքին տարաձայնությունները, ամբիցիաները, միավորվել, ստեղծել պաշտպանության կոմիտե (կամ անունը ոնց ուզում եք, դրեք) և սկսել համատեղ աշխատանքը։
Բոլոր նրանց, ովքեր հասկանում են վտանգը, առաջարկում եմ բոլոր հնարավոր «խողովակներով» դիմել քաղաքական ուժերին, պահանջելով միավորվել հանուն Հայաստանի ապագայի ու սկսել աշխատել ոչ թե «մնա մյուս շաբաթ, տեսնենք ինչ է լինում» ռեժիմով, այլ իսկականից։
Այնպես չէ, որ ժամանակն անսահմանափակ է ու կարող ենք շաբաթներով «սրան-նրան հավան եմ-հավան չեմ» խաղացնել։ Եթե մի քիչ էլ այսպես «հով լռվենք», թշնամին Սյունիքը ՀՀ-ից կտրելու է։ Այս պահի դրությամբ դրա համար պլացդարմներ արդեն պատրաստել է։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել