Aravot.am-ը գրում է.
ՌԴ Պետդումայի պատգամավոր Կոնստանտին Զատուլինի Հայաստան մուտքը արգելելուց հետո, «Ռուսաստանն այսօր» լրատվական գործակալության գլխավոր խմբագիր, ազգությամբ հայ Մարգարիտա Սիմոնյանը գրառում էր կատարել իր սոցիալական ցանցերում հայտնելով, որ իր մուտքն էլ Հայաստան անցանկալի է համարվում:
Aravot.am-ը հարցում ուղարկեց Սիմոնյանի մամուլի ծառայություն՝ հստակեցնելու համար, թե կոնկրետ ո՞վ, ե՞րբ ու ի՞նչ պատճառով է արգելել Մարգարիտա Սիմոնյանի մուտքը Հայաստան: Հարցմանը Մարգարիտան պատասխանել է անձնապես, նշելով՝ «Կարող եմ միայն ասել, որ իմ Հայաստան այցի անհնար լինելու վերաբերյալ ստացել եմ ազդակ վստահություն վայելող աղբյուրներից: Պատճառների մասին ոչ մի պատկերացում չունեմ: Արգելել հայուհու մուտքը Հայաստան՝ նոր խոսք է հայ ժողովրդի պատմության մեջ»:
Հավելենք նաև, որ Կ. Զատուլինի միջադեպից մեկ օր անց ՌԴ ԱԳՆ Մարիա Զախարովան հայտարարեց, որ իրենք դիվանագիտական խողովակներով ճշտում են կատարվածի պատճառները և հավելեց, որ եթե տեղեկությունը հաստատվի, ապա դժվար կլինի այդ մոտեցումը որակել որպես բարեկամական քայլ՝ համապատասխանող ռուս-հայկական հարաբերությունների դաշնակցային բնույթին:
