Պակիստանի օդային տարածքը մինչև մայիսի 30-ը փակ կլինի Հնդկաստան և Հնդկաստանից առևտրային թռիչքների համար, տեղեկացնում է ՏԱՍՍ-ը՝ հղում կատարելով The Asian Age-ին։
Պակիստանյան կողմը սպասում է Հնդկաստանում համընդհանուր խորհրդարանական ընտրությունների ավարտին, ինչից հետո երկրների միջև հարաբերությունները, գուցե փոխվեն դեպի լավը, նշում է պարբերականը։
Հնդկաստան միջազգային չվերթները հաճախ անցնում են Պակիստանի օդային տարածքով, և շատ պետությունների ավիաընկերությունները ֆինանսական մեծ կորուստներ են կրում։ Ավելացել է նաև թռիչքների տևողությունը, քանի որ ավիափոխադրողները ստիպված են երկարացնել երթուղին Պակիստանը շրջանցելու համար, բարձրացել են ավիատոմսերի գները։
Հնդկաստանի և Պակիստանի միջև լարվածությունն աճել է հնդկական ուժայինների ավտոշարասյան վրա Ջամու և Քաշմիր նահանգում փետրվարի 14-ի հարձակումից հետո, ինչի հետևանքով ավելի քան 40 մարդ է զոհվել։
