Թուրքիայում վերընտրված նախագահ Ռեջեփ Թայիփ Էրդողանի երդմնակալությունից ու կառավարության նոր կազմի հայտարարումից հետո երկրում կդադարեցվի արտակարգ դրության ռեժիմը, ինչի մասին հայտարարել է վարչապետ Բինալի Յըլդըրըմը, գրում է թուրքական «Հյուրրիյեթ» պարբերականը։

Նշենք, որ Էրդողանի երդմնակալության արարողությունը նախատեսված է հուլիսի 9-ին, նույն օրը հայտնի կդառնա նոր կառավարության կազմը։

Հիշեցնենք, որ Թուրքիայում արտակարգ դրության ռեժիմը գործում է 2016-ի հուլիսից ի վեր՝ երկրում տեղի ունեցած հեղաշրջման փորձից հետո։

2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել