Լիբանանը Բաղդադում կայացած բանակցությունների ընթացքում Իրաքին առաջարկել է նավթի տարանցման երթուղի դեպի Միջերկրական ծով՝ շրջանցելով Հորմուզի նեղուցը։ Այս մասին հայտնում է The National-ը՝ հղում անելով երկու երկրների պաշտոնյաներին։
Իրաքի վարչապետի ֆինանսական հարցերով խորհրդական Ալի ազ-Զեյդի Մուդհիր Մոհամմեդ Սալեհի խոսքով՝ Լիբանանի վարչապետ Նավաֆ Սալամի Բաղդադ այցի գլխավոր նպատակն էր «վերակառուցել տնտեսական հարաբերությունները, որոնց հիմքում էներգետիկ ոլորտն է»։
Նա հավելել է, որ լիբանանյան պատվիրակությունն առաջարկել է օգտագործել Լիբանանի տարածքը՝ որպես Իրաքի համար դեպի Միջերկրական ծով լրացուցիչ ելք։
«Եթե այս գաղափարը կյանքի կոչվի, Լիբանանը կստանա կարևոր լոգիստիկ դեր, իսկ Իրաքի համար կբացվի դեպի համաշխարհային շուկաներ նոր առևտրային ուղի», – ասել է նա։
Իր հերթին Լիբանանի էներգետիկայի նախարար Ջո Սադդին բանակցությունները բնութագրել է որպես «շատ դրական»։ Նրա խոսքով՝ երկու երկրները պայմանավորվել են ստեղծել համատեղ տեխնիկական աշխատանքային խումբ, իսկ իրաքյան պատվիրակությունը մոտ ժամանակում կայցելի Լիբանան՝ ծրագրերի իրականացման հնարավորությունները գնահատելու համար։
«Այս փուլում դրանք դեռ միայն մտադրությունների մասին հայտարարություններ են», – նշել է Սադդին։
Նրա խոսքով՝ քննարկումները չեն սահմանափակվում միայն հին խողովակաշարի աշխատանքը վերականգնելու հարցով։
Մասնավորապես, նախատեսվում է ուսումնասիրել Սիրիայից դեպի Լիբանանի Տրիպոլի քաղաք ձգվող նավթամուղից ճյուղ կառուցելու հնարավորությունը, ինչպես նաև Լիբանանում նավթավերամշակման գործարանի կառուցումը, որը կօգնի բավարարել երկրի ներքին պահանջարկը նավթամթերքի նկատմամբ։
