Եվրոպական միությունը Ռուսաստանի դեմ պատժամիջոցների 19-րդ փաթեթն է ընդունել՝ կապված Ուկրաինայի պատերազմի հետ, հայտնել է եվրոպական դիվանագիտության ղեկավար Կայա Կալասը։ «Այն ուղղված է, մասնավորապես, ռուսական բանկերի, կրիպտոբորսաների, Հնդկաստանում և Չինաստանում գործող կազմակերպությունների դեմ», - գրել է նա X-ում։ ԵՄ-ն նաև որոշել է սահմանափակել ռուս դիվանագետների տեղաշարժը, «որպեսզի հակազդի ապակայունացման փորձերին»։ «Պուտինի համար գնալով ավելի է դժվարանում այս պատերազմի ֆինանսավորումը», - ընդգծել է Կալասը։
Բացի այդ, նոր պատժամիջոցները ներառում են ռուսական հեղուկ բնական գազի (ՀԲԳ) ներմուծման արգելք, հայտնել է ԵՄ-ում Դանիայի նախագահությունը։ Սահմանափակումները կներդրվեն երկու փուլով. կարճաժամկետ պայմանագրերը կդադարեցվեն վեց ամսից, իսկ երկարաժամկետները՝ 2027 թվականի հունվարի 1-ից։ 19-րդ փաթեթը «ստվերային նավատորմի» սև ցուցակը համալրում է 117 լցանավով, ինչի արդյունքում դրանց ընդհանուր թիվը կավելանա՝ 441-ից դառնալով 558։ Ընդհանուր առմամբ, ԵՄ միջոցառումները կազդեն 45 կազմակերպությունների վրա, որոնք օգնել են Կրեմլին շրջանցել պատժամիջոցները, ներառյալ Չինաստանում և Հոնկոնգում գործող 12 ընկերությունները, գրում է Bloomberg-ը։ Կարգելվեն նաև հինգ ռուսական բանկերի հետ գործարքները և կրիպտոակտիվների հետ կապված ծառայությունների մատուցումը՝ Ռուսաստանի քաղաքացիների, ռեզիդենտների և իրավաբանական անձանց համար։
Ավելի վաղ ԵՄ դիվանագիտական աղբյուրները Reuters-ին հայտնել են, որ սահմանափակումները կանդրադառնան նավթարդյունաբերության հետ կապված չորս չինական ընկերությունների վրա։ Դրանց թվում են երկու նավթավերամշակման գործարան, մեկ առևտրային ընկերություն և մեկ կազմակերպություն, որն օգնում է Ռուսաստանին շրջանցել պատժամիջոցները։
Սլովակիան վերջին երկիրն էր, որը դանդաղեցրել է նոր փաթեթի ընդունումը: Վարչապետ Ռոբերտ Ֆիցոն Եվրահանձնաժողովից երաշխիքներ է խնդրել՝ բարձր էներգակիրների գները վերահսկելու և կլիմայական քաղաքականության մեջ արդյունաբերական շահերը հաշվի առնելու համար: Սլովակ դիվանագետը հայտարարել է, որ երկրի պահանջները բավարարվել են հինգշաբթի օրը՝ ԵՄ առաջնորդների գագաթնաժողովի եզրափակիչ հաղորդագրությանը ավելացված նոր դրույթներով:
Ուկրաինայի նախագահի աշխատակազմի ղեկավար Անդրեյ Երմակը ողջունել է ԵՄ պատժամիջոցների նոր փաթեթը՝ հայտարարելով, որ դրանում ներառվել են Կիևի բազմաթիվ առաջարկներ։ «Բայց մենք կանգ չենք առնում։ Թիվ 20 փաթեթն արդեն մշակման մեջ է։ Տրամաբանությունը պարզ է՝ Ռուսաստանում քիչ գումարը նշանակում է քիչ հրթիռներ Ուկրաինայում», - հայտարարել է նա։
