Tert.am-ը գրում է․
Թուրքմենստանը պատրաստ է Եվրոպային բնական գազ մատակարարել։ Այս մասին Euronews հեռուստաալիքին տված հարցազրույցում հայտարարել է Թուրքմենստանի Խալք Մասլախաթի (Ժողովրդական խորհուրդ) նախագահ Գուրբանգուլի Բերդիմուհամեդովը։
«Եվրոպական էներգետիկ շուկան աշխարհում ամենամեծերից մեկն է։ Ժամանակակից պայմաններում դա պահանջում է էներգետիկ մեծածավալ հումքի անխափան մատակարարումներ՝ եվրոպական տնտեսության կայուն զարգացման համար։ Թուրքմենստանը պատրաստ է սերտ գործակցել եվրոպացի գործընկերների հետ՝ բնական գազի մատակարարման հարցում»,- մասնավորապես, ասել է նա։
Բերդիմուհամեդովը նշել է, որ մատակարարման ուղիներից մեկը տրանսկասպյան երթուղին կարող է լինել։
«Մենք միշտ շեշտել ենք Կասպից ծովում էներգետիկ լիարժեք գործընկերության ստեղծման, այդ թվում՝ արևմտյան ուղղությամբ ստորջրյա խողովակաշարերի անցկացման անհրաժեշտությունը։ Դա մեր օրինական իրավունքն է՝ ամրագրված Կասպից ծովի իրավական կարգավիճակի մասին կոնվենցիայում»,- ընդգծել է նա։