ԱՄՆ նախագահ Ջո Բայդենն առաջին անգամ մեկնաբանել է Ուկրաինայի զինված ուժերի ներխուժումը Ռուսաստանի Կուրսկի մարզ՝ իրավիճակն անվանելով «իսկական երկընտրանք» ՌԴ նախագահ Վլադիմիր Պուտինի համար։ Այս մասին հաղորդում է Reuters գործակալությունը։
«Սա իսկական երկընտրանք է ստեղծում Պուտինի համար», - Նյու Օռլեանում լրագրողների հետ զրույցում ասել է Բայդենը։
Նա նաև հայտնել է, որ ԱՄՆ իշխանությունները մշտական կապի մեջ են ուկրաինական կողմի հետ՝ կապված զորքերի առաջխաղացման հետ։ Շուրջ 1000 ուկրաինացի զինվորներ օգոստոսի 6-ից մտել են Կուրսկի մարզ՝ տանկերով և զրահապատ մեքենաներով։ Ուկրաինան հայտնել է, որ մարզում վերահսկում է 74 բնակավայր։
Իր հերթին Սպիտակ տան խոսնակ Կարին Ժան-Պիեռը լրագրողների հետ ճեպազրույցում հայտնել է, որ ուկրաինական իշխանությունները նախապես չեն տեղեկացրել ԱՄՆ վարչակազմին Կուրսկի մարզ ներխուժելու մասին։
«Մենք դրա հետ կապ չունենք։ Ուկրաինան ինքը պետք է խոսի իր ռազմական գործողությունների մասին։ Այս հարցում մեր քաղաքականությունը չի փոխվել», - ասել է Սպիտակ տան խոսնակը։
Բայդենը մայիսին Կիևին թույլ է տվել ամերիկյան զենքերն օգտագործել Ռուսաստանի տարածքում թիրախների հարվածելու համար՝ Ուկրաինայի Խարկով քաղաքում ռուսական հարձակումը հետ մղելու համար։
