«Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը վաղ առավոտյան ուղիղ միացումով ներկայացրեց Բաղրամյան պողոտայում տիրող իրավիճակը։
Բարի լույս մաղթելով պայքարի մասնակիցներին՝ Սրբազանն ասաց, որ այսօր ժամը 15։00-ին բոլորին սպասում է Բաղրամյան պողոտայում։
«Ժամը 15։00-ին բլորիդ սպասում եմ ժողովուրդ»,- ասաց Սրբազանը։
Հիշեցնենք, որ նախօրեին նա հայտարարել էր. «Այո΄, վաղը չափազանց կարևոր օր է, եթե կուզեք շատ ծանր ու ծանրակշիռ, վաղը ժամը 15։00-ին շատ մեծ թվով պետք է հավաքվենք, որովհետև ասելիք եւ անելիք ունենք:
Այն մարդիկ, որոնց դուք վճարում եք, մերժել են ժողովրդի այն հատվածի պահանջը, որը համաձայն չէ այս իրականության հետ։ Եվ դա մեծ մասն է կազմում մեր ժողովրդի։ Այսօր որ անկյունում կանգնես, դրա մասին են խոսում։ Առանցքը կազմում է այս իշխանության մերժումը: Շատ հաստատուն կերպով այս մարդկանց պետք է գործազուրկ դարձնենք։ Իրենք պետք է հասկանան` աղետ է բերում իրենց աշխատանքը, ինչպես նաև մահ և դժբախտություն: Դիմում եմ բոլոր նրանց, ովքեր իրենց սրտում փոփոխության կարիք են տեսնում` ներկա եղեք այստեղ` վերջնական ու վճռական խոսք ասելու այս մարդկանց»։
Հիշեցնենք, որ հունիսի 9-ից Բաղրամյան պողոտան փակ է: Բագրատ Սրբազանն իր աջակիցների հետ վրաններ է տեղադրել պողոտայում եւ շուրջօրյա նստացույց հայտարարել:
