Hraparak.am-ը գրում է.
Ֆրանսիական Musliman En France հրատարակության գլխավոր խմբագիր Ժան-Միշել Բրունը, ով հայտնի է իր ադրբեջանամետ հայտարարություններով և կողմնակալ դիրքորոշմանբ, ադրբեջանական CBC-ի եթերում խոսել է Էվիան-լե-Բեն քաղաքում ադրբեջանցի բանաստեղծուհի Նաթավանի հուշարձանի շուրջ ստեղծված իրավիճակի և Փարիզի և Բաքվի միջև հարաբերությունների լարվածության պատճառների մասին:
«Ֆրանսիայի Էվիան-լե-Բենի քաղաքապետ Ժոզե Անլին քաղաքապետարանի խորհրդում ասել է, որ Նաթավանի հուշարձանը մինչ ապամոնտաժումը պատվել է թաղանթով։ Ընդդիմադիր փոխքաղաքապետը, սակայն, անհամաձայնություն է հայտնել հասարակության նման դեգրադացիայի հետ՝ համարելով, որ Ֆրանսիայի քաղաքը չի կարող քանդել բանաստեղծուհու արձանը, առավել ևս՝ կանանց ազատագրման ակտիվիստի։
Քաղաքապետն Ադրբեջանի դեսպանին բացատրել է, որ արձանը ծածկված է հայ ակտիվիստների վնասներից պաշտպանելու համար, և որ այն ապամոնտաժելու մասին խոսք լինել չի կարող»,- ասել է Ժան-Միշել Բրունը:
Նրա խոսքով, այս բացատրությունը հազիվ թե համոզիչ լինի, մանավանդ որ քաղաքապետը վերանվանել է այն հրապարակը, որտեղ գտնվում է արձանը և բոլոր զբոսաշրջային գրքույկներից, իբր, հանել է «Ադրբեջան» բառը։
«Իրականում Էվիան-լե-Բեն քաղաքի հայ համայնքը փոքրաթիվ է և չի կարող ճնշում գործադրել քաղաքապետարանի վրա։ Սակայն քաղաքապետը խոստովանել է, որ մասնավոր կերպով հետևել է իր ադրբեջանաֆոբ կուսակցության հրահանգներին:
Այս միջադեպը ցույց տվեց այն ուժեղ լարվածությունը, որը ներկայումս առկա է Ֆրանսիայի և Ադրբեջանի միջև։ Այն ժամանակ, երբ Ադրբեջանն ու Հայաստանը միասին փորձում են խաղաղության ուղի գտնել, Ֆրանսիան շարունակում է աջակցել հայ անջատականներին նույնիսկ հակառակ Փաշինյանի կառավարության կամքին»,- ասել է ֆրանսիացի մեդիագործիչը։
