«168 ժամ»-ը գրում է.
Հնարավո՞ր է՝ Մաքսային միությունն ի վերջո չկայանա, և այս «շիլաշփոթի» արդյունքում Հայաստանը փչացնի հարաբերությունները Եվրամիության հետ, «168 ժամ» պարբերականի հարցին ի պատասխան, ՀՀ ԿԲ նախկին նախագահ Բ.Ասատրյանը պատասխանել է, որ այս պահին Մաքսային միությունը կա, բայց այնտեղ շատ խնդիրներ և հակասություններ կան.
«Զարգացման տեսանկյունից հեռանկարները մշուշոտ են, և եթե քաղաքական խնդիրները մի կողմ դնենք, ապա զուտ տնտեսական տեսանկյունից ավելի հավանական է, որ չկայանա: Բայց խոսքը 1 տարվա մասին չէ. այլ առնվազն 5 տարվա, դա երկար գործընթաց կլինի, որը պայմանավորված է շատ հանգամանքներով: Մի բան հստակ է եթե նավթի գինը հասնի 1 բարելի դիմաց 50-60 դոլարի, ապա կքանդվեն միանգամից Մաքսային և նմանատիպ բոլոր միությունները, որոնք ավելի շատ քաղաքական նախաձեռնություն են. տնտեսական բովանդակությունը մինչև վերջ բացահայտված չէ»:
Բ.Ասատրյանի դիտարկմամբ՝ ԵՄ-ի և ՄՄ-ի հետ Հայաստանի հարաբերությունները համատեղելի չեն, քանի որ դրանք առևտրային և մաքսային տարբեր համակարգեր են:
Տնտեսագետի խոսքով Ռուսաստանը և ՄՄ անդամները պաշտպանողական քայլեր են կատարում, իրենց շուկան պաշտպանում են, այդ թվում եվրոպացիներից: Եվ եթե Հայաստանը դառնա ՄՄ անդամ, ապա դրանից հետո ներկրվող մեքենաների մաքսատուրքերը կտրուկ կբարձրանան, օրինակ՝ 10 տարեկան «Մերսեդես» բերելու համար մաքսատուրքերը կաճեն 4-5 անգամ, այսինքն եթե այսօր նման մեքենայի մաքսազերծումդ 5000 դոլար արժե, ապա ՄՄ անդամությունից հետո կարժենա 20-25 հազար դոլար»:
Հոդվածն ամբողջությամբ՝ կարդացեք «168 ժամ»-ի այսօրվա համարում