Լուսանկարներն արվել են երկուշաբթի՝ նոյեմբերի 1-ին, Maxar Technologies-ի կողմից, գրում է թերթը։ Դրանց վրա, ըստ հրապարակման, կարելի է տեսնել ռազմական տեխնիկայի, այդ թվում՝ տանկերի կուտակում Սմոլենսկի մարզի Ելնյա քաղաքի մոտ։ Ելնյան գտնվում է Բելառուսի հետ սահմանի մոտ՝ Ուկրաինայի հետ սահմանից մոտ 250 կմ հեռավորության վրա։
1-ին գվարդիական տանկային բանակի տեխնիկայի տեղափոխումն այնտեղ, ըստ հրապարակման, սկսվել է սեպտեմբերի վերջին։ Ինչպես հայտնում է Politico-ն՝ վկայակոչելով ռազմական թեմաներով Jane’s բրիտանական հրատարակության տվյալները, Ռուսաստանի 4-րդ տանկային դիվիզիայի տեխնիկան տեղափոխվել է Բրյանսկի և Կուրսկի շրջակայք՝ Ուկրաինայի հյուսիսային սահմանից ոչ հեռու։
Ստորաբաժանումները համալրված են Տ-80ՈՒ մարտական տանկերով և ինքնագնաց հրետանային կայանքներով։ Հրապարակումը պնդում է, որ տարածքում նկատվել են նաև 1-ին գվարդիական տանկային բանակի ստորաբաժանումներ։
Ուկրաինայի պաշտպանության նախարարությունը հայտնել է, որ նոյեմբերի սկզբի դրությամբ ուկրաինական սահմանների մոտ և ժամանակավոր օկուպացված տարածքներում տեղակայված է մոտ 90 000 ռուս զինծառայող։
«Ուկրաինայի պաշտպանության նախարարությունն ուշադիր հետևում է իրավիճակին Ռուսաստանի Դաշնության հետ Ուկրաինայի պետական սահմանի մոտ և Ղրիմի և Դոնեցկի ու Լուգանսկի շրջանների ժամանակավոր օկուպացված տարածքներում։
Ուկրաինայի հետախուզական գործակալությունների տրամադրած փաստերն իրենց հաստատումն են գտնում Ուկրաինայի շուրջ ստեղծված իրավիճակի մասին տեղեկատվության փոխանակման մեջ։
Պաշտպանության նախարարության հետախուզության գլխավոր վարչության տվյալներով՝ 2021 թվականի նոյեմբերի սկզբի դրությամբ մեր սահմանի մոտ և Ռուսաստանի Դաշնության ժամանակավոր օկուպացված տարածքներում կենտրոնացած է զորքերի (ուժերի) խմբավորում՝ մոտ 90 000 մարդ ընդհանուր թվով»,-ասվում է ՊՆ հաղորդագրությունում:
Հիշեցնենք, որ Ուկրաինայի զինված ուժերի գեներալ-լեյտենանտ Ալեքսանդր Պավլյուկը երեկ հայտարարել էր, որ Ուկրաինան պատրաստ է էսկալացիայի և Դոնբասում ռազմական գործողությունների նոր փուլի։
«Մենք պատրաստ ենք էսկալացիայի, պատրաստ ենք ռազմական գործողությունների նոր փուլի, բացի կայունացման օպերացիայից, մենք պատրաստ ենք պաշտպանական գործողության, հնարավորության դեպքում հակահարձակողական գործողություն կանցկացնենք»,- ասել է Պավլյուկը։
Նա վստահեցրել է, որ ուկրաինական զորքերը պատրաստ են դրան։ Բացի այդ, Պավլյուկն ասել է, որ «Դոնբասի ինքնահռչակ հանրապետությունների ներկայացուցիչներին չի համարում անկախ միավոր, որն ունի իր կարծիքը»:
«Սրանք սովորական խամաճիկներ են: Այս ամենն ունի մեկ նպատակ՝ նվազագույնի հասցնել Ուկրաինայի ներուժը և ստիպել նրանց նստել բանակցությունների սեղանի շուրջ Ռուսաստանի պայմաններով»,- նկատել է գեներալ-լեյտենանտը։
Հիշեցնենք, որ Ուկրաինայի պաշտպանության նախարար Անդրեյ Տարանը երեկ հրաժարականի դիմում է ներկայացրել։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել
