ՀՀ կառավարությունը դարձյալ առաջարկում է կրճատել Նոր տարվա հանգստյան օրերը

Armeniasputnik.am-ը գրում է.

ՀՀ կառավարության վաղվա նիստի օրակարգում «ՀՀ տոների և հիշատակի օրերի մասին» օրենքի փոփոխության հերթական նախագիծն է ներկայացված, որով կրկին առաջարկվում է կրճատել ամանորյա հանգստյան օրերը` ոչ աշխատանքային թողնելով միայն դեկտեմբերի 31-ն ու հունվարի 1-ը։ Հունվարի 2-ը, 3-ը, 4-ը, 5-ը և 7-ը առաջարկվում է դարձնել աշխատանքային օրեր, իսկ հունվարի 6-ը` Սուրբ ծնունդը, թողնել ոչ աշխատանքային։

Գործադիրը նախատեսում է նախագիծն ընդունել առանց զեկուցման ու քննարկման։

Նշենք, որ նույն նախագիծը մեկ անգամ արդեն ներկայացվել էր կառավարության դատին 2021թ–ի ապրիլի 15-ին, բայց որոշ տարբերությամբ։ Այն ժամանակ էկոնոմիկայի նախարարությունն առաջարկում էր աշխատանքային օրեր դարձնել դեկտեմբերի 31-ը, հունվարի 3-ը, 4-ը, 5-ը և 7-ը, իսկ Ամանորը նշել 2 օր` հունվարի 1-ին ու 2-ին։

Այն ժամանակ նախագծին կտրուկ դեմ էր արտահայտվել աշխատանքի և սոցիալական հարցերի այժմ արդեն նախկին նախարար Մեսրոպ Առաքելյանը` ասելով, որ նախարարության հիմնավորումը, թե հանգստյան օրերի քանակով Հայաստանը գերազանցում է մի շարք երկրների, իրականությանը չի համապատասխանում։ Բացի այդ, նրա խոսքով, այլ երկրներում ընդունված է մարդկանց լրացուցիչ ոչ աշխատանքային օրեր տրամադրել տոնական օրերին կամ շաբաթ -կիրակի աշխատելու դիմաց, ինչը Հայաստանում ևս չի արվում։

Ինչ վերաբերում է տնտեսական ցուցանիշներին, Առաքելյանը նշել էր, որ ոչ աշխատանքային օրերին առևտրի և ծառայությունների ոլորտում ավելի շատ համախառն ներքին արդյունք է ապահովվում հյուրանոցների, սննդի կետերի, առևտրի հաշվին, քան աշխատանքային օրերին։

Նման բուռն քննարկումից հետո վարչապետ Փաշինյանն առաջարկել էր հետաձգել հարցն ու այն քննարկել ավելի ուշ, ավելի հանգիստ միջավայրում։

Հիշեցնենք, որ ՀՀ նախկին վարչապետ Կարեն Կարապետյանը դեռևս 2017 թ–ին առաջարկում էր կրճատել ամանորյա ոչ աշխատանքային օրերը։ Նախատեսվում էր 2018թ.–ից տոնական ոչ աշխատանքային օրերի ցանկից հանել հունվարի 3-ը, 4-ն ու 5-ը։

Բայց այդ նախագիծը ևս մերժվել էր ու հետաձգվել անորոշ ժամանակով։