Մեր ժողովուրդը, պարզվեց, շատ բարի ու օրինապաշտ է, որովհետև ցանկացած ուրիշ դեպքում, երբ հայրենիքն այս վիճակի մեջ ընկներ, այդ ղեկավարը 2-3 օրից ավելի չէր մնա, մենք գնում ենք օրինական, բարի ճանապարհով: Այս մասին Հանրապետության հրապարակում Նիկոլ Փաշինյանի հրաժարականի պահանջով հանրահավաքին հայտարարեց «Հայրենիքի փրկության շարժման» վարչապետի թեկնածու Վազգեն Մանուկյանը:
Նա իր խոսքում նշեց, որ պատերազմի ժամանակ Նիկոլ Փաշինյանը հասցրեց այն ամենածանր վիճակին, կարող էր շուտ կանգնել, բայց ինքը կանգնացրեց այն պահին, որ մենք ունենանք ամենամեծ կորուստը: «Հրաժարական տալուց նույնն է անելու, ինքը դուրսը կգա այն պահին, երբ ամենամեծ վնասը կբերի մեր պետությանը, դա բնավորություն է, և մեզնից է կախված, որ այդ պրոցեսը արագացնենք»,- հայտարարեց նա:
Մանուկյանը ևս մեկ անգամ նշեց, որ իրենք գնում են հանդարտ, օրինական ճանապարհով, բայց նա չպետք է մնա, և իրենց ճանապարհը և գործողություններն օրեցօր պետք է խոստանան: «Պահ կգա, որ չենք նայի, թե ինչն է ճիշտ, ինչը՝ սխալ, կարևորն այն է, որ նա գնա: Մաղթում եմ մեզ բոլորիս հաղթանակ, առանց հաղթանակի մենք չենք ունենա հայրենիք»,- եզրափակեց նա:
