Քանի դեռ ԱՄՆ Ներկայացուցիչների պալատի կողմից բանաձևի ողջունելի ընդունումը մեզ վերջնականապես գլխապտույտի մեջ չի գցել, ասեմ․ շեղվում եք, հարգելի «սևեր», և շեղվում եք՝ համաձայն հարգելի «սպիտակների» ծրագրավորած շեղման պլանի: Երկիրը մտնում է 2020թ.-ի պետական բյուջեի քննարկման ժամանակահատված, որտեղ «տնտեսական հեղափոխություն» խոստացող «սպիտակները», նույն ինքը՝ հեղափոխականները, պլանավորել են, ուշադրություն, «պահպանողական կանխատեսմամբ բյուջե»:
Այս մոտեցման հիմքում մակրոտնտեսական կայունության սկզբունքն է, որը նախկին իշխանության տնտեսական քաղաքականության հիմքն էր և տնտեսական փիլիսոփայությունը, կարծում եմ՝ նաև նրանց իշխանության պոտենցիալի սպառման խորքային և դեռևս չվերլուծված պատճառներից մեկը:
Հարգելի՛ «սպիտակներ», դուք ֆանտաստիկ արագությամբ որդեգրել և նույնիսկ «թյունինգի» եք ենթարկել բոլոր այն համակարգային խոտանները, որոնք առկա էին «սևերի» համակարգում, ինչը ձեր պարագայում կանխատեսելի էր դեռ շատ վաղուց: Դուք ոչ միայն գաղափարապես և մասնագիտական պոտենցիալով նորի ունակ և պատրաստ չեք, այլ նաև կարծում եք, որ հնի խոտանները վերացնելով նույն «հինը» կդառնա առողջ «նոր»: Մինչդեռ ոչ միայն հին փիլիսոփայությունը և մոտեցումները չեն վերանում, այլ դրանց ավելանում են նաև դեֆորմացված և լեգիտիմությունից արբած, քաղաքական և հատկապես իրավական անբռնազբոս վարքի էլեմենտներ:
Ձեր քաղաքական «իդեա ֆիքսերով», «իրավական էքստրեմիզմով», նոր քաղաքական «հերոսներով» և նրանց առաջ դրված կասկածելի միսիաներով փորձում եք շեղել ուշադրությունը կարևոր խնդիներից: Հասկանում եմ՝ «ֆեյքակրատիան» այլևս սկսել է սպառել իրեն, և էֆեկտը թուլացել է: Հասկանում եմ, որ մտածել եք նոր ազդեցության ֆորմուլաներ և, թույլ տվեք ասել, շատ կասկածելի քաղաքական «խաղավարներով»: Պարզ է նաև, որ այդ «խաղավարներին» վերապահված է անցյալի մեջ հարձակման նոր ռեսուրս գտնելու և այն շահարկելու առաքելությունը: Սակայն շեղեք նրանց, ովքեր շեղվում են, մի՛ նկատեք նրանց, ովքեր դեռ լուռ ենթադրություններ են անում:
Շուտով ձեր իշխանության անխուսափելի և խորը բյուրոկրատացման և նիհիլիզմի փուլ եք մտնելու: Ամեն ինչ այս քաղաքական վարքաբանության պարագայում դեռ առջևում է: Շատ քչերն են շուտով ձեզ համեմատելու «նախկինների» հետ, ժամանակը հոսում է, և շատ-շատերն են ձեզ համեմատում հենց ձեր հեղափոխական սկզբնական կերպարի և բնույթի հետ: Ձեր «ազդեցության ֆորմուլաները» և դրանց «խաղավարները» կորցնելու են իրենց էֆեկտը դեռ գործը չսկսած: Ճիշտ այնպես, ինչպես ֆեյքակրատիան: Իսկ նոր ազդեցության ռացիոնալ ֆորմուլաներ ոչ ոք ձեզ չի առաջարկելու, այն պարզ պատճառով, որ վստահելի գործընկեր չեք, իսկ դուք էլ ունակ չեք գեներացնելու դրանք: Մնացածը շիրմա է և ուրիշ ոչինչ, իսկ շիրմայի կարևորագույն ցուցիչը տնտեսական հեղափոխություն ներկայացված բլեֆն է, որը իրականության մեջ ունի տրամագծորեն հակառակ «պահպանողական» բնույթ: Շեշտում եմ՝ «հեղափոխականը» ունի «պահպանողական» բնույթ, իսկ դրանք իրարամերժ երևույթներ են:
Հ.Գ. Պատկերավոր ասած՝ մեզ հավաստիացնում են, որ խոհանոցում պատրաստում են մեր ամենասիրած և երկար սպասված համեղ ուտեստը: Հավաստիացումների ազդեցությունից մենք նույնիսկ զգում ենք դրա բույրը, սակայն իրականում խոհանոցում պատրաստվում է ամենասովորական և արդեն հոգնեցրած ամենօրյա ճաշը: Քանի դեռ այն մեզ չի մատուցվել, մենք դեռ բույրի թվացյալ զգացողությամբ շարունակում ենք սպասել։
