Forbes-ը պատրաստել է հետաքրքիր հոդված՝ այն մասին, թե ինչպես է թիմի հանդեպ հոգատարությունը բարձրացնում լիդերի հեղինակությունն ու նպաստում աշխատանքի արդյունավետության մեծացմանը։
Մի քանի տարի առաջ աշխատում էի 74.000 անդամից բաղկացած առողջապահական ընկերության հետ։ Նրանք կազմել էին մի մեծ ընտանիք. յուրաքանչյուր կլինիկայի մենեջերի հրավիրում էին հաճախելու մենեջմենթ զարգացման 5-օրյա ծրագրի։ Շաբաթվա ընթացքում գլխավոր գործադիր տնօրենը բոլորին հավաքում էր «Town Hall»-ում, լսում նրանց հարցերը և կիսվում ցանկացած օգտակար ինֆորմացիայով։ Ամենակարևորը նրա շփումն էր յուրաքանչյուրի հետ՝ անհատապես, որը ցույց է տալիս նրա հոգատար վերաբերմունքը 24 մենեջերներից յուրաքանչյուրի նկատմամբ։
Ինչպե՞ս է նրան հաջողվում այդքան բովանդակալից կապ պահպանել նրանցից յուրաքանչյուրի հետ։ Նա օգտագործում է մի հնարք, որի մասին, սակայն, քչերը գիտեն։ Հանդիպումից օրեր առաջ նրա օգնականը կազմում է մի փաստաթուղթ, որը պարունակում է յուրաքանչյուր մենեջերի լուսանկարը, անունը և այլ կարևոր ինֆորմացիա (շրջանավարտ որդի կամ դուստր, վերջին վիրահատություն, մեծ հաջողություն և այլն)։ Մինչև սենյակ մտնելը տնօրենը մտապահում է այս ինֆորմացիան, այնպես որ ներսում կարողանա յուրաքանչյուրին դիմել անունով և հետաքրքրվել նրանց կյանքով։
Սա, իհարկե, ժամանակ և ուշադրություն է պահանջում, սակայն այն ազդեցությունը, որ այս պրակտիկան ունենում է աշխատանքի վրա, իսկապես արժե դրան։ Ես ինքս եմ տեսել դա։ Մարդիկ իրենց իսկապես կարևոր էին զգում։
Արդյոք այս տնօրենին հետաքրքրու՞մ են արդյունքները. իհարկե, այո։ Նա կենտրոնացա՞ծ է ընկերության աճի վրա. միանշանակ։ Սակայն միևնույն ժամանակ նրա ուշադրությունն ուղղվում է լիովին այլ աշխատանքի՝ իր թիմի հետ հաղորդակցություն կառուցելու վրա։ Եվ քո գործն էլ, արպես ղեկավարի, պետք է նույնը լինի։
Լինել լավ ղեկավար չի նշանակում կենտրոնանալ քո վաճառքի, քո հաճախորդների, քո արդյունքների վրա։ Լինել լավ ղեկավար նշանակում է հոգ տանել այն մարդկանց մասին, ում ղեկավարում ես։ Իհարկե, պարզից էլ պարզ է, որ պետք է մտածես քո թիմի մասին, սակայն կարևոր է վերաբերմունքդ դրսևորել ոչ միայն բառերով, այլև գործով, ընտրել հաղորդակցության այնպիսի ձև, որը թույլ կտա մարդկանց զգալու քո ուշադրությունը։
Ամենակարևոր կետն այն է, որ երբ մարդիկ աշխատանքային միջավայրում իրենց լավ, անկաշկանդ են զգում, նրանք շատ ավելի պրոդուկտիվ են դառնում ։ Նրանք գիտեն, որ լիովին նորմալ է արտահայտել իրենց անհանգստությունը, իրենց ուժեղ և թույլ կողմերը, իրենց անհատական, ստեղծարար մոտեցումն ունենալ աշխատանքի հանդեպ։
Հավատացեք, դուք պետք է ջանք ու եռանդ չխնայեք, որ ձեր թիմն զգա, որ կանգնած եք նրանց մեջքին, որ սատարում եք նրանց։
Վերջապես, հոգատարությունը ստեղծում է վստահություն, իսկ վստահությունը՝ հավատարմություն։ Վերջինս այն է, ինչ ստիպում է լավ մասնագետներին մնալ և նպաստել քո բիզնեսին։ Երբ մարդիկ լավ հարաբերություններ են ունենում իրենց ղեկավարների հետ, շատ ավելի շահագրգռված են լինում, ավելի լավ աշխատում, ավելի պատրաստակամ լինում՝ հավելյալ աջակցություն ցուցաբերել իրենց թիմին։
Ահա մեկ այլ փայլուն օրինակ, թե ինչպես է պետք հոգատարություն ցուցաբերել։ Այն ընկերության տնօրենը, որի հետ ես աշխատում եմ, մեկնարկում է 30 լիդերներից բաղկացած խմբի՝ ղեկավարման հմտությունների զարգացման ծրագիր։ Նա մտնում է սենյակ և շատ պարզ բացատրում մարդկանց, թե ինչու է իր ներդրումն ունենում նրանց զարգացման գործում՝ «Ես մտածում եմ ձեր և ձեր աճի մասին։ Հուսով եմ՝ այս ծրագիրը կզինի ձեզ այն ամենի դեմ, որ կյանքը կարող է նետել ձեր ճանապարհին, այլ ոչ միայն այս ընկերության պատերից ներս հանդիպող խնդիրների»։
Այս մի քանի բառը ֆանտաստիկ ներգործություն են ունենում մարդկանց վրա։ Նա դրանք համեմում է արտահայտիչ ժեստերով, և ամեն բան պատրաստ է։
Այսպիսով, ինչպե՞ս կարող ես հոգ տանել թիմիդ մասին. ահա 3 եղանակ.
1. Անձնական շփում. հետաքրքրվիր մարդկանց կյանքով։ Հարցեր տուր և իսկապես լսիր պատասխանները։ Հիշիր կարևոր ինֆորմացիան, ինչպիսին է ծնունդը, ընտանիքի անդամների անունները, կարևոր իրադարձությունները և այլն։ Գրի առ դրանք, եթե կօգնի։ Բայց ամենից առաջ անձնական շփում հաստատիր քո թիմի յուրաքանչյուր անդամի հետ։ Հանդիպիր բոլոր նորեկներին։ Սրա համար միգուցե ստիպված լինես դուրս գալ հարմարավետությանդ զոնայից, բայց արդյունքում կունենաս գործին ավելի նվիրված թիմ։
2. Միացրու կետերը. հարցրու աշխատողներիցդ, թե իրենց կարծիքով՝ ո՞րն է իրենց ազդեցությունը կազմակերպության վրա։ Կիսվիր նրանց հետ քո կարծիքով։ Մենք բոլորս ուզում ենք իմանալ, որ այն, ինչ անում ենք, կարևոր է, և որ մեր ժամանակը, էներգիան և ստեղծարար ուժը ինչ-որ կարևորություն ունեն։ Օգնիր յուրաքանչյուրին տեսնել այն փոփոխությունը, որի հեղինակն իրենք են։ Նրանք ավելի շատ կներգրավվեն աշխատանքի մեջ և կհասնեն մեծ հաջողությունների։
3. Զատիր կարևորն անկարևորից. օգնիր աշխատողներիդ հասկանալ՝ ինչն է կարևոր նրանց համար։ Ինչպե՞ս կարող են օրվա վերջում իմանալ՝ որքանով էր ստացված այդ օրվա աշխատանքը։ Օրինակ, եթե քո բիզնեսը սպասարկման ոլորտում է, օրվա ստացված լինելը կարող ես չափել հաճախորդների ժպիտներով կամ ստացված եկամուտով։
Սկսիր այսօրվանից և քայլ առ քայլ մոտեցիր վերջնական արդյունքին։
