ՀՅԴ համամասնական ցուցակի հրապարակումից հետո կասկածի տակ դրվեց ամենաակտիվ ու գործունյա պատգամավորներից մեկի` Լիլիթ Գալստյանի վերընտրվելն առաջիկա խորհրդարանական ընտրություններում. նրա անունը ցուցակում 20-րդն է: Դա դարձավ լրահոսի ամենաթեժ հարցերից մեկը, քանի որ պատգամավորն աննախադեպ սեր ու հարգանք է վայելում նաև լրագրողական դաշտում: Լիլիթ Գալստյանի ինքնագնահատականը դրանից չի ընկել, նա չի դառնացել, թեև անակնկալի եկել է:
«Չեմ սեթևեթի` ասելով, թե չեմ ուզում լինել խորհրդարանում,-ասում է նա,- ես քաղաքական մարդ եմ, թե՛ անելիք ունեմ, թե՛ ասելիք, և հավատում եմ, որ կարելի է, և պարզապես անհրաժեշտություն է մեր իրականությունը փոխելը։ Ես սիրում եմ, պաշտում իմ երկիրը։ Ու նաև մտածում եմ, որ իմ քաղաքական թիմը հաջողելու է, ու մենք միասին ծառայելու ենք Հայաստանին: Հակաքաղաքակրթական աղբից պետք է մաքրել մեր երկիրը»։
Բայց եթե անգամ հաջորդ խորհրդարանում չլինի, համոզված է, որ կշարունակի մնալ քաղաքականության մեջ իբրև քաղաքացի, իբրև հայացք, իբրև չափանիշներ կրող և հասարակությանը արժեքներ փոխանցող անհատ. «Քաղաքականությունից իմ հեռանալու մասին լուրերը չափազանցված են,- ասում է նա,- միևնույն է, ես քաղաքականության մեջ լինելու եմ, եթե ոչ խորհրդարանական ամբիոնից, ապա իմ գրիչով, իմ հրապարակախոսությամբ, իմ մշակութային, գիտական գործունեությամբ»:
Մի կողմից էլ Լիլիթ Գալստյանին հաճելի հուզմունքի առիթ է տվել 20-րդ տեղը. «Երբեք չեմ մտածել, որ այսքան սիրված ու գնահատված եմ։ Ինձ իսկապես հուզում է հասարակության արձագանքը,- ասում է նա,- երբ անծանոթ մարդիկ կանգնեցնում ու համակրանք, աջակցություն են արտահայտում։ Ավելի լավ գնահատական…»:
Լիլիթ Գալստյանը զգացված է նաև լրագրողների արձագանքից. «Եվ դա այն դեպքում, որ մեր լրագրողական դաշտը միշտ չէ, որ անկախ է, անկողմնակալ, միշտ չէ, որ կարողանում է թեփը ցորենից տարբերել։ Ուրեմն հինգ տարին անպտուղ չի անցել»:
Շարունակությունն՝ այստեղ
