Times.am-ը գրում է.
 ԱԺ պատգամավոր, ՀԱԿ խմբակցության քարտուղար Արամ Մանուկյանը առաջիկա ընտրություններում հույսը դնում է ժողովրդի զգոնության վրա: Պատգամավորի համոզմամբ՝ նրանց առաջ քաշած խաղաղության ծրագրին շատ մարդիկ են ընդառաջ գնալու:
 «Եթե երկար եւ հիմնավոր կարողանանք աշխատել ծրագրի վրա, շատ ձայներ կունենանք: Ուրախությամբ կարող եմ ասել, որ մեզ արդեն միացել են անգամ տարեց կոմունիստներ, ովքեր ՀԱԿ-ի հետ ոչ մի կապ չեն ունեցել, բայց մարտահրավերը, վտանգը տարիքով փորձված մարդիկ, այսպես ասած, լավ են զգում: Այդպես շատ մարդիկ միանում են մեր ծրագրին, եւ եթե խելոք աշխատենք, ձայների բավականաչափ լուրջ քանակ կունենանք, որը խորհրդարանում ծրագիրն առաջ տանելու հնարավորություն կտա: Երկու բան կարող եմ ասել՝ փող չենք բաժանելու, երբեք չենք արել ու կոչ ենք անում ժողովրդին ձայն չտալ փող բաժանողին»,-ասաց ԱԺ պատգամավորը:

Արամ Մանուկյանը լավատեսորեն է տրամադրված առաջիկա ընտրություններին՝ հույս հայտնելով, որ անգամ եթե նրանք չլինեն խորհրդարանում, իշխանությունները կիրագործեն խաղաղության ծրագիրը:

«Ամենայն անկեղծությամբ եմ ասում, թող իշխանություններն այս ծրագիրն իրականացնեն, թեկուզ մենք չլինենք խորհրդարանում: Ում է պետք խորհրդարանը, եթե երկրում խաղաղություն չլինի, ում եմ պետք ես որպես պատգամավոր, եթե իմ երեխաները, բարեկամներն ու համադասարանցիները չլինեն Հայաստանում: Թող իշխանությունները խոհեմ լինեն, վտանգները զգան եւ գնան խաղաղության դաշինքի կնքմանը, ինչը կտա Հայաստանին զարգացման հնարավորություն, ոչինչ ես էլ հաճույքով կգնամ, կնկարեմ, նկարներս կվաճառեմ կամ մի որոշ ժամանակ անց կհրավիրեմ իմ անհատական ցուցահանդեսին,-եզրափակեց նա:

Հայաստանում խորհրդարանական ընտրությունները կկայանան ապրիլի 2-ին, իսկ նախընտրական քարոզարշավը կմեկնարկի մարտի 5-ին:

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել