Azatutyun.am-ը գրում է.
 «Բարգավաճ Հայաստան» կուսակցության ղեկավար, Հայաստանի Ազգային ժողովի Եվրոպական ինտեգրման հարցերի հանձնաժողովի նախագահ, Եվրոպայի խորհրդի Խորհրդարանական վեհաժողովում (ԵԽԽՎ) հայկական պատվիրակության անդամ Նաիրա Զոհրաբյանը նամակ է հղել Եվրախորհրդի գլխավոր քարտուղար Թորբյորն Յագլանդին՝ «առնվազն տարակուսելի» որակելով նրա հայտարարությունը դեկտեմբերի 29-ին հայ - ադրբեջանական սահմանին տեղի ունեցած միջադեպի վերաբերյալ:
 Ընդգծելով, որ Յագլանդը մշտապես աչքի է ընկել անկողմնակալ և հավասարակշիռ հայտարարություններով, Զոհրաբյանը շարունակում է. - «Ես հասկանում եմ, որ Ձեր հայտարարության հիմնական ուղեցույցը եղել է ԵԱՀԿ Մինսկի խմբի համանախագահների ոչ հավասարակշիռ և խիստ կողմնակալ հայտարարությունը, սակայն, հարգարժան գլխավոր քարտուղար, ես չէ, որ Ձեզ պետք է ասեմ, որ մարդասիրությունը չի կարող ընտրովի լինել և մարդասիրությունն իրավունք չունի քաղաքական գունավորում ունենալ։ Ես կհասկանայի Ձեզ, եթե դուք նույնպիսի ջանասիրությամբ ժամանակին հստակ գնահատական տայիք Ադրբեջանի կողմից կատարված վայրագություններին՝ դիվերսիաներին, անթույլատրելի զինատեսակների կիրառմանը, զինվորների և քաղաքացիական անձանց խոշտանգումներին և դիակների պղծումներին, եթե Դուք կոչ անեիք Ադրբեջանին հարգել միջազգային պարտավորությունները և եթե Դուք դատապարտեիք այն, ինչ արեց Ադրբեջանը ապրիլյան վերջին պատերազմի ժամանակ՝ գլխատելով և անարգելով հայ զինվորներին ու քաղաքացիական անձանց, սպանելով երեխաներին։ Բոլոր այդ փաստերը ժամանակին Ձեզ տրամադրվել են։ Սակայն, թե՛ ԵԱՀԿ Մինսկի խումբը և թե՛ Դուք զարմանալիորեն չհիշեցիք մարդասիրության և միջազգային իրավունքի մասին, ինչը առնվազն տարակուսելի է, եթե չասեմ՝ խիստ դատապարտելի»։
 «Փաստն այն է, որ սահմանային վերջին միջադեպը Ադրբեջանի հերթական դիվերսիան էր, և Ձեր մատնանշած զինվորը չեզոքացվել է Հայաստանի տարածքում՝ դիվերսիոն գործողություն իրականացնելու ժամանակ», - շեշտում է Նաիրա Զոհրաբյանը:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել