Ես չեմ հիշում Հայաստանում քիչ թե շատ ֆորս-մաժորային իրավիճակ, ընտրական քարոզարշավ, ընտրություններ, ցույցեր և քաղաքական-հասարակական տարաբնույթ իրադարձություններ, որոնց ընթացքում գոնե մեկ անգամ հնչած չլինի Սփյուռքի ներգրավվածության, մասնակցության կարևորության մասին։ Տարբեր առիթներով մենք սովոր ենք մեղադրել մեր սփյուռքի հայրենակիցներին, թե միայն գալիս են Հայաստան, նկարվում Արարատի ֆոնին ու գնում՝ առանց գոնե տարածական հեռավորությունից մասնիկը դառնալով մեր երկրում ծավալվող իրադարձություններին, և ընդ որում՝ Սփյուռքի հասցեին այսպիսի մեղադրանքներ հնչեցրել ենք այն պայմաններում, երբ այս մարդիկ, սուբյեկտիվ մի շարք պատճառներից բացի, առաջին հերթին ունեին բազմաթիվ օբյեկտիվ պատճառներ ներհայաստանյան իրականությանն անհաղորդ մնալու։
Բայց այսօր, երբ այդ նուն Սփյուռքի մշակութային գործիչները որոշել են ակտիվ մասնակցություն ունենալ սպասվող ընտրություններին և դիտորդական առաքելություն իրականացնել, սոցցանցային «քարոզիչներն» անցել են գործի և ինչ-որ չհիմնավորված բան են փորձում փնտրել ու գտնել աշխարհահռչակ հայ մշակութային գործիչների արարքներ մեջ, և գիտե՞ք ինչու, քանի որ այս սոցցանցային քարոզիչները լավ գիտեն, որ մեր երկրում ընտրությունները կեղծվելու են հենց իրենց «գործատու», «պատվիրատու» իշխանությունների կողմից, և այս մարդիկ իրենց ընտրական նկրտումների դեմ են գործելու։ Բայց ինչ էլ չխոսեն իշխանական կերակրատաշտակից սնվողները, սա հիանալի նախաձեռնություն է, և Սփյուռքն առաջին անգամ գործուն մասնակցություն է ունենում Հայրենիքում ծավալվող գործընթացներին։ Այս նախաձեռնությունը լավ ազդակ է հենց Սփյուռքի մյուս ներկայացուցիչների համար, ովքեր միգուցե աստիճանաբար կդադարեն Հայրենիքն ասոցիացնել վերացական ինչ-որ հասկացության հետ և կհասկանան, որ դրա բարօրության համար պետք է նաև անմիջական մասնակցություն և պայքար։
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել