Ոստիկանությունը հաղոդագրություն էր տարածել, որով պահանջել է Խորենացի փողոցում հավաքվող ցուցարարներին՝ հավաքն այլ վայր տեղափոխել, հակառակ դեպքում սպառնալով դադարեցնել հավաքը: Ոստիկանությունը ներկայացրել է նաև պահանջի իրավական հիմքերը:
Հիմնադիր խորհրդարանի առաջին դեմքերից Ալեք Ենիգոմշյանն այդ կապակցությամբ նշել է, որ հավաքի վայրը քաղաքացիներն են որոշում, իսկ ոստիկանությունը իրավունք չունի դադարեցնելու հավաքը:
Ենիգոմշյանի տրամաբանությունը ընդհանուր հասկանալի է, սակայն իրավական տեսանկյունից ուժեղ չէ հենց միայն նրանով, որ եթե հուլիսի 17-ից հետո հավաքը խորենացի փողոցում ինքնաբուխ էր, ապա արդեն մի քանի օր է կազմակերված հավաքներ-միջոցառումներ են տեղի ունենում:
Ճիշտն ասած խնդիր չեմ դրեմ իմ առջև ապացուցելու, որ Խորենացի փողոցում հավաքները անօրինական են, դրանք ես չեմ որոշում, ուղղակի լավ կլիներ, որ ոստիկանության հայտարարությունների առնչությամբ ուժեղ փաստարկներ ներկայացնել, որովհետև անկախ պայքարի նպատակներից, օրինական, ինքնիշխան, իրավական պետություն կառուցելու ճանապարհին, պետք է իսկզբանե գործել օրինական:
Դրա համար միայն անհրաժեշտ է, որպեսզի գործին կպնեն կոմպետենտ մարդիկ, ովքեր ոչ թե ականջահաճո բառեր կհնչեցնեն ժողովորդի իրավունքների մասին, այլ կներկայացնեն այն իրավական հիմքերը, ինչը նրանց թույլ է տալիս հավաքը հենց Խորենացում անցկացնել:
Ժողովրդի վստահությունը թանկ կապիտալ, բայց այն արագ սպառվելու ավանդույթ ունի:
