ՀՀ Նախագահ Սերժ Սարգսյանը, որ տեսել է պատերազմ, լավ գիտի` ինչ բան է պատերազմը և չէր ցանկանա, որ ուրիշներն էլ տեսնեին:
«Միակ դեպքը, երբ պատերազմելն արդարացված է, դա այն դեպքում է, որ դու այլ ելք չունես դրանից բացի: Դու պետք է քո հողը պաշտպանես, քո հայրենիքը: Մեր ընտրությունը վաղուց ենք կատարել»,-հայտարարեց ՀՀ Նախագահ Սերժ Սարգսյանը` Վիեննայից ժամանող օդանավում հարցազրույց տալով հայ լրագրողներին:
«Մենք ցանկանում ենք խնդիրը լուծել խաղաղ ճանապարհով, որ ավելորդ կորուստներ չունենանք, որևէ պարագայում չեմ համարում արդարացված մեր լավագույն տղաների` հանուն հայրենիքի զոհվելը: Շատ լավ կլինի, որ նրանք հանուն հայրենիքի գործեն , հանուն հայրենիքի ապրեն, բայց եթե, նորից եմ կրկնում, եթե խախտեն հրադադարի պայմանները, ուղղակի ստիպված ենք լինելու պատասխանել»,-նշեց ՀՀ Նախագահը:
Սերժ Սարգսյանն ընդգծեց նաև, որ հայկական կողմի համար կարևոր է, որպեսզի համանախագահները մեկ անգամ ևս համոզվեն, որ հայկական կողմի նպատակը ստատուս քվոյի պահպանումը չէ, մեր նպատակը չէ հավերժ պատերազմելը»:
Պատասխանելով լրագրողի հարցին, թե «համաձայնություն կայացե՞լ է շփման գծում միջադեպերի հետաքննության մեխանիզմների ու մոնիտորինգայի սարքավորումների տեղադրման շուրջ» և կարո՞ղ ենք փաստել, որ պայմանավորվածություն է ձեռք բերվել և համանախագահները և Ադրբեջանի նախագահը ընդունել են, որ անվտանգության ու կայունության հաստատման համար հենց այդ քայլերը պետք է իրագործեն, Հայաստանի Նախագահն առաջարկեց մեծ ուշադրություն չդարձնել պայմանավորվածությունների ձեռքբերմանը:
«Հաշվի առնելով անցյալի մեր փորձը, ինչպես ասացի` 20 հանդիպում ենք ունեցել, այս հանդիպումների ընթացքում բազմաթիվ բաների մասին ենք պայմանավորվել, բայց Ադրբեջանի նախագահը, վերադառնալով Բաքու , բոլորովին այլ հայտարարություններ է արել»,-նկատեց Սերժ Սարգսյանն ու ավելացրեց` կյանքը ցույց կտա, թե այս անգամ ինչպես կզարգանան իրադարձությունները:
