Կատարվե՛ց... Այսօր ադրբեջանցի պատգամավոր Ռովշան Ռզաևը հանդես է եկել օրենսդրական նախաձեռնությամբ, որն, ըստ էության, ամերիկացի Քրիստոֆեր Սմիթի «հակաադրբեջանական» օրինագծի պատասխանն է: Ինչպես հայտնի է՝ ԱՄՆ Հելսինկյան հանձնաժողովը Սմիթի գլխավորությամբ Կոնգրես է ներկայացնել մի օրինագիծ, որը նախատեսում է պատժամիջոցներ սահմանել Ադրբեջանի և այդ երկրի մի շարք պաշտոնյաների հանդեպ: Միլի Մեջլիսի մամուլի ծառայությունը դեռ երեկ հավաստիացնում էր, թե իբր օրինագիծն ընդունվել չի կարող, քանի որ ԱՄՆ վարչակազմը դեմ կլինի դրան: Այսօր, սակայն, կենացները քաղցրացել են, և նշված ծառայությունը Սմիթի նախաձեռնությունը հակաադրբեջանական է համարում ու խստագույնս դատապարտում:
Սույն Ռզաևը Միլի Մեջլիսի քաղաքականության և պետական շինարարության կոմիտեի նախագահի տեղակալն է, պատրաստել է մի օրինագիծ, որտեղ քննության է առնում ոչ ավել, ոչ պակաս Մարդու իրավունքների վիճակն ԱՄՆ-ում: Փաստաթղթում նշված է, որ Ադրբեջանն իր անկախության տարիներին բազմիցս է առնչվել ԱՄՆ տարբեր կազմակերպությունների երկակի ստանդարտների քաղաքականությանը: Նախագծում ասված է, որ ամերիկյան որոշ կազմակերպություններ տարբեր պատրվակներով փորձում են միջամտել Ադրբեջանի ներքին ու արտաքին քաղաքականությանը: Ադրբեջանն իր հերթին հիշեցնում է, որ ԱՄՆ-ն ամեն կերպ խուսափում է ստորագրել Մարդու իրավունքներին վերաբերող ՄԱԿ-ի համաձայնագրերը: Մինչև այժմ, իբր, երեխաների պաշտպանության կոնվենցիային չի միացել միայն երկու երկիր՝ Սոմալին և ԱՄՆ-ը:
Ադրբեջանի խորհրդարանականի նախագծով առաջարկվում է ԱՄՆ-ի հետ դադարեցնել էներգետիկայի, անվտանգության և ռազմական ոլորտների համագործակցությունը, կասեցնել ադրբեջանցի զինվորականների մասնակցությունն Աֆղանստանի խաղաղապահ գործողությանը, արգելել ԱՄՆ ռազմական և այլ բեռների տարանցիկ փոխադրումն Ադրբեջանի տարածքով, ինչպես նաև Ադրբեջանի ենթակառուցվածքների օգտագործումը... Այսքանը դեռ մի կերպ կարելի է ընկալել, բայց «մեծ էշն ախոռում է մնացել». պատգամավոր Ռզաևն առաջարկում է սկսել ԵԱՀԿ Մինսկի խմբի համանախագահի պաշտոնից ԱՄՆ-ի հետկանչի գործընթացը:
Իրոք որ անկանխատեսելի ժամանակ ենք ապրում: Հարցն այն չէ, թե համեմատաբար փոքր Ադրբեջանը «քյալլա» է տալիս ԱՄՆ-ի պես գերտերության հետ. սա, անշուշտ, նախագահ Ալիևի «հնարամտությունն է» ԱՄՆ-ին հասկացնելու, որ երկրի խորհրդարանականներն ինքնուրույն նախաձեռնություններ են ցուցաբերում երկրի «թասիբը» պահելու նպատակով:
Ադրբեջանցիներին չէր խանգարի մի քիչ զգուշանալ, քանի որ, ինչպես ժողովուրդն է ասում, «փորձված աղվեսը զույգ ոտքով է թակարդն ընկնում»:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել