Tert.am-ը գրում է.
Փարիզում նոյեմբերի 13-ին տեղի ունեցած ահաբեկչությունների ամենաերիտասարդ զոհերից էր մեր հայրենակցուհին՝ 17-ամյա Լոլա Ուզունյանը։ Նա մահացել է «Բատակլան» համերգասրահում ռոք համերգի ժամանակ ահաբեկիչների բացած կրակից։
Նրա հայրը՝ Էրիկ Ուզունյանը, մի շարք ընտանիքների հետ բոյկոտել է նոյեմբերի 27-ին անցկացված ահաբեկչությունների զոհերի հիշատակի արարողությունը և իշխանություններին ուղղված բաց նամակ հրապարակել Huffington Post թերթում։
Էրիկ Ուզունյանը սուր քննադատության է ենթարկել քաղաքական առաջնորդներին։
«Նման քաղաքականությունը ողբերգական ազդեցություն է ունեցել մեր երկրի վրա։ Վերջին նախագահները ոչ հեռանկարային հայացքներով օժտված անպատասխանատու գործունեություն են վարել»,- գրել է նա:
Տղամարդն իր խոսքն ավարտել է՝ գրելով. «Ես սարսափած եմ իմ դատարկվող երկրի և իմ դստեր մահվան կապակցությամբ»։
Հիշեցնենք, որ նոյեմբերի 13-ի երեկոյան Փարիզում ահաբեկչությունների շարք է տեղի ունեցել: Անհայտ անձինք կրակ են բացել քաղաքի ռեստորաններից մեկում, երեք պայթյուն գրանցվել է «Ստադ դե Ֆրանս» մարզադաշտի մոտակայքում, որտեղ տեղի էր ունենում Ֆրանսիայի և Գերմանիայի հավաքականների ընկերական հանդիպումը և որին ներկա էր Ֆրանսիայի նախագահ Ֆրանսուա Օլանդը:
Բացի այդ, «Բատակլան» համերգասրահում ռոք համերգի ընթացքում ահաբեկիչները պատանդ են վերցրել ներկաներին։ Ահաբեկչությունների հետևանքով զոհվել է շուրջ 130 մարդ, վիրավորվել՝ ավելի քան 300-ը։
