Tert.am-ը գրում է.
ԱԺ «Հայ Յեղափոխական Դաշնակցություն» խմբակցության պատգամավոր Արծվիկ Մինասյանը ԱԺ-կառավարություն հարց ու պատասխանի ժամանակ հարց բարձրացրեց «Նաիրիտ» գործարանի ապագայի հետ կապված:
Պատգամավորը հետաքրքրվեց՝ արդյոք կառավարությունը շարունակում է մտածել, որ գործարանը պետք է վերագործարկվի: Արծվիկ Մինասյանը հարցրեց նաև՝ Հայաստանը վերցրե՞լ է բաժնետոմսերը որպես իր սեփականություն և որքանո՞վ են համապատասխանում իրականությանը տեղեկությունները, որ գործարանում սկսվել է գույքի վաճառք:
Ի պատասխան ՀՀ էներգետիկայի և բնական պաշարների նախարար Երվանդ Զախարյանը նշեց, թե «Նաիրիտ»-ը շարունակում է մնալ պարապուրդում: Ըստ Զախարյանի՝ յուրաքանչյուր ամիս նախարարության և կառավարության միջոցների հաշվին վճարվում են «Նաիրիտ» չաշխատող գործարանի աշխատակիցները՝ 70-ից 75 միլիոն դրամի չափով:
Երվանդ Զախարյանը նշեց, որ կառավարությունը կողմ է գործարանի վերագործարկմանը և եթե լինի պոտենցիալ ներդնող, ապա իրենք պատրաստ են քննարկել հարցը:
«Այսօր վերագործարկման համար նպատակահարմար ժամանակ չէ, ինչ կլինի գործարանի ճակատագիրը, չեմ կարող ասել: Բաժնետոմսերի հետ կապված՝ պրոցեդուրային աշխատանքներ միջպետական բանկի կողմից տարվում են, սպասում ենք վերջնական լուծմանը: Մոտակա շաբաթներին բանկի վերջնական որոշումը կլինի, ինչից հետո կանցնեն պետական իրավասության տակ»,- նշեց Երվանդ Զախարյանը:
Անդրադառնալով գույքի վաճառքին, Զախարյանը հավաստիացրեց՝ իրականության հետ կապ չունեն տարածված տեղեկությունները, որևէ գույք չի վաճառվել:
Արծվիկ Մինասյանը հարց հնչեցրեց, թե նախարարը չի կարծո՞ւմ, որ պետք է հանդես գա օրինագծով, որ պաշտպանի «Նաիրիտ»-ի գույքը և ներկայացնի նախընտրելի մի սխեմա, որ ներդրողները ցանկություն հայտնեն ներդրումներ անել:
Ըստ պատգամավորի՝ ոչ մի ներդրող չի պարտավորվի հիմա ներդրումներ կատարել, երբ «Նաիրիտը» նման վիճակում է:
Երվանդ Զախարյանն էլ հորդորեց այս առնչությամբ կոնկրետ առաջարկ անել:
