Պայքարն ընթանում է նախագահական ընտրությունների առաջին փուլում առավել շատ ձայներ ստացած թեկնածուներից երկուսի՝ Արայիկ Հարությունյանի և Մասիս Մաիլյանի միջև:

Նախագահական ընտրությունների առաջին փուլը տեղի էր ունեցել մարտի 31-ին, որի ժամանակ նախագահի 14 թեկնածուներից ոչ ոք 50 տոկոսից ավելի ձայն չէր ստացել, հետևաբար՝ ըստ Արցախի Սահմանադրության, այս պարագայում անցկացվում է ընտրությունների երկրորդ փուլ։ 

Արցախի Կենտրոնական ընտրական հանձնաժողովը հիմք ընդունելով ԱՀ ընտրական օրենսգրքի 76-րդ հոդվածի 6-րդ մասի պահանջը, Կենտրոնական ընտրական հանձնաժողովը նիստում ամփոփել էր 2020թ. մարտի 31-ին անցկացված ԱՀ նախագահի և Ազգային ժողովի հերթական ընտրությունների արդյունքները։ 

Քննարկված հարցերի մի մասը վերաբերել է Նախագահի ընտրություններին: Մասնավորապես, ղեկավարվելով ԱՀ Սահմանադրության 89-րդ հոդվածի 3-րդ մասով, ԱՀ ընտրական օրենսգրքի 92-րդ հոդվածի 1-ին մասի  2-րդ կետով և 97-րդ հոդվածի 3-րդ մասով, հիմնվելով ընտրությունների արդյունքների վրա, նիստում որոշվել էր 2020թ. ապրիլի 14-ին անցկացնել ԱՀ նախագահի ընտրությունների երկրորդ փուլ` քվեարկության օրը` ապրիլի 14-ի երեքշաբթին հայտարարելով ոչ աշխատանքային օր:

Արցախում մարտի 31-ին կայացած նախագահական ընտրություններում ընտրողների թիվը կազմել է 104 348, իսկ քվեարկությանը մասնակցել է 76 728 ընտրող, այսինքն՝  ընտրողների 73,5 տոկոսը: Անվավեր քվեարթերթիկների թիվը կազմել է 2625: Թեկնածուներից ամենաշատ ձայներն ստացել էր Արայիկ Հարությունյանը՝ 36 076 քվե (49.26 տոկոս), այնուհետև Մասիս Մայիլյանը՝ 19 360 քվե (26.4 տոկոս) և Վիտալի Բալասանյանը՝ 10 755 ձայն կամ 14,7 տոկոս:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել