ԵՄ-ն Նիկոլի կողքին է, իսկ Ռուսաստանը որտե՞ղ է

Ռուբիոյի կողմից Նիկոլին ուղղված ջերմ շնորհավորանքին զուգահեռ ԵՄ-ն մի հայտարարություն է տարածել, որով կոչ է արել քաղաքական դերակատարներին համակերպվել փաստացի կեղծված ընտրությունների արդյունքների հետ՝ միաժամանակ շեշտելով՝ ՌԴ-ն կոշտ կերպով միջամտել է ընտրություններին, կիրառել հիբրիդային գործիքակազմեր և այլն: «…ԵՄ-ն ի գիտություն է ընդունում Հայաստանի ընտրական իշխանությունների կողմից հայտարարված նախնական արդյունքները, որոնք մատնանշում են վարչապետ Նիկոլ Փաշինյանի «Քաղաքացիական պայմանագիր» կուսակցության հստակ առաջատարությունը: Մենք կոչ ենք անում բոլոր քաղաքական դերակատարներին հարգել քվեարկության արդյունքները…»,-մասնավորապես՝ ասված է  հայտարարության մեջ, որտեղ նաև նշվում է, որ ԵՄ-ն ամուր կանգնած է Հայաստանի և նրա ժողովրդի կողքին և հավատարիմ է մնում՝ Հայաստանին իր ժողովրդավարական ուղու վրա աջակցելու:
 
Նախ՝ արձանագրենք, որ  ԵՄ-ի ուղերձն ունի հստակ աշխարհաքաղաքական երանգավորում. Ռուսաստանի անվանական հիշատակումը, որը նման դեպքերում բավական բացառիկ երևույթ է, վկայում է այն մասին, որ Հայաստանը դարձել է աշխարհաքաղաքական մրցակցության առաջնագիծ, որտեղ առանցքային դերակատարությունը Նիկոլինն է, որին ԵՄ-ն աջակցելու է՝ իրականում, սակայն, աջակցելով «Արևմտյան Ադրբեջանի» օրակարգին. այդ օրակարգի հաջող ռեալիզացիան է, որ օգնելու է Կովկասից դուրս դնել Մոսկվային:
 
Ինչ վերաբերում է ընդդիմությանն ուղղված կոչին, ապա այդ կոչն ակնհայտորեն կրում է ուլտիմատիվ բնույթ. հասկացնում են, որ չեն աջակցելու հնարավոր պայքարին, ինչն էլ իր հերթին նշանակում է, որ Արևմուտքը «կանաչ լույս է վառում» ՔՊ-ի առաջ՝ արյան մեջ խեղդելու ցանկացած ընդդիմադիր բողոք. կհայտարարեն, թե Նիկոլը ժողովրդավարությունն է պաշտպանում և վերջ:
 
Իրականում այս ամենը կանխատեսելի էր. Արևմուքտն առաջ է  տանում այստեղ իր աշխարհաքաղաքական շահերը: Այլ հարց, թե հակառակ բևեռն ինչ է պատրաստ անել, ձեռքերը լվանալու ու մի կողմ են քաշվե՞ն, թե՞ ակնհայտորեն կեղծված ընտրությունները կդառնան առիթ՝ Հայաստանը կրկին ռուսական ազդեցության ծիր մտցնելու: Նիկոլի հետ նեյնիմ-նեյնիմ անելու ռեսուրս Ռուաստանը չունի այլևս: