Ամերիկյան Amazon ընկերության Project Kuiper ինտերնետ արբանյակների առաջին խմբաքանակն ուղեծիր է արձակվել United Launch Alliance (ULA) Atlas V հրթիռի միջոցով Ֆլորիդայի Կանավերալ հրվանդանից: Այս մասին հայտնում է AP-ն։
Առաջիկա շաբաթների ընթացքում 27 սարք կհասնի մոտ 630 կմ բարձրության։ Ջեֆ Բեզոսի կողմից հիմնադրված Amazon-ը նախատեսում է ուղեծիր դուրս բերել ավելի քան 3,200 նման արբանյակներ՝ համաշխարհային լայնաշերտ ինտերնետ հասանելիություն ապահովելու համար:
Ինչպես նշել է Amazon-ը, արբանյակների նոր տարբերակը ստացել է «զգալի բարելավումներ»՝ համեմատած 2023 թվականի փորձարկված նմուշների հետ։ Նախագիծը նախատեսված է ձեռներեց Իլոն Մասկի SpaceX-ի Starlink-ի հետ մրցելու համար։ Վերջինս արդեն արձակել է ավելի քան 8,000 արբանյակ, որոնցից ավելի քան 7,000-ը մնում են ուղեծրում։ Եվրոպական OneWeb օպերատորն ունի հարյուրավոր սարքեր ավելի բարձր բարձրությունների վրա:
