Պետության վախճանն ազդարարող իր փետրվարտասնինյան ուղերձում Նիկոլը հայկական հայրենասիրությունը հռչակել է համաշխարհային սպառնալիք՝ հայտարարելով, թե խաղաղությունն առաջին հերթին տարածաշրջանային գործոն է, որովհետև խաղաղությունը կամ նրա բացակայությունն առաջին հերթին արտահայտվում է անմիջական հարևանների հետ հարաբերություններում, ապա՝ միջազգային, ապա՝ համաշխարհային: «…Ես ինձ թույլ կտամ արտահայտվել ավելի առտնին լեզվով՝ խաղաղությունը պետք է դառնա ապրելակերպ, բնավորություն, խասյաթ…»,-մասնավորապես՝ արտահայտվել է Նիկոլը՝ միաժամանակ հստակեցնելով՝ խաղաղությունը հարևանների միջավայրում առանց կողմնակի աջակցության ապրելու հմտությունն է:

Նիկոլի թիրախում «հայի խասյաթ» կոչվածն է, որին, ըստ նրա, բնորոշ է «անբարշմազությունը». հայերն են, ըստ Նիկոլի, տարածաշրջանում խաղաղության հաստատման թշնամիները, ուստի պետք է վերանայել սեփական «խառնվածքը»: Այսինքն՝ Նիկոլն առաջ է տարել Իլհամի թեզը, որի լույսի ներքո Ադրբեջանը ներկայացվում է որպես «հայկական ռևանշիզմի» զոհ, որի պատճառով զոհ է դառնում տարածաշրջանը, իսկ դրա պատճառով՝ արդեն ողջ աշխարհը: Զգացի՞ք մինչև ուր է Նիկոլը հասնում: Նա փաստացի հայերիս ֆաշիստ է հռչակում:

Ինչ վերաբերում է առանց կողմնակի աջակցության հարևանների հետ յոլա գնալուն, ապա այստեղ թիրախն առավելապես ռուսներն են, բայց, իհարկե, ոչ միայն նրանք. Նիկոլը դեմ է Հայաստանին արտաքին աշխարհից ցուցաբերվելիք ցանկացած օժանդակության. կողմ է Հայաստանի մենությանը, իսկ մեր նման երկրի համար մենությունը հավասարազոր է լինելու ինքնաոչնչացման:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել