Արմավիրի մարզի Այգեվան համայնքում մոդուլային տիպի 144 տեղ հզորությամբ մսուր-մանկապարտեզի հարցը Կառավարության նիստում դարձել է մի կաթիլ մեղրի պատմությունը. նորանշանակ ՏԿԵ նախարար Խուդաթյան Դավոն սեփական մաշկի վրա է զգացել՝ ինչ է ասել Նիկոլին ենթակա լինել Կառավարությունում: Պարզվում է՝ Նիկոլը խոստացել էր, որ արդեն այս տարվա հոկտեմբերին մսուր-մանկապարտեզը կհանձնվի շահագործման, մինչդեռ Դավոն նիստում երկար-բարակ փորձել է բացատրել, թե ինչու ցայսօր այն չի գործում, ինչն էլ հարուցել է Նիկոլի կատաղությունը: «Հա բայց էլի, որ գալիս ենք այցի, գոնե մի՛ ասեք՝ հոկտեմբերին բացվելու ա: Հիմա մարդիկ, ասենք էդ գյուղի ժողովուրդը տեսել են, չէ՞, տեսախցիկների առաջ ասել եմ՝ երբ ա բացվում, ասել եմ՝ հոկտեմբերին ա բացվում, ես էլ գրել եմ՝ հոկտեմբերին մանկապարտեզը բացվում ա: Հիմի չստացվե՞ց, որ սուտ ասեցի, ստացվեց: Ասենք խի՞ եք ասում տենց՝ հոկտեմբերին բացվում ա»,-ասել է Նիկոլն ու նախազգուշացրել, որ չի հանդուրժելու ժամկետների խախտում. խախտողները կրելու են անձնական պատասխանատվություն:

Նիկոլը, իհարկե, թքած ունի մանկապարտեզների կամ մարզաբնակ ազգաբնակչության բարեկեցության հարցի վրա. նրան տեսախցիկներն են հետաքրքրում: Ինչո՞ւ: Որովհետև մարդն ընտրությունների է նախապատրաստվում: Այստեղ հարցը ոչ թե մսուր-մանկապարտեզի բացվել-չբացվելն է, այլ՝ այն, թե ինչ է խոսվել կամ խոստացվել տեսախցիկների առաջ: Էականը ոչ թե աշխատանքի արդյունքն է, այլ՝ Նիկոլի հեղինակությունը, քանի որ վերջինս կարծում է, որ եթե ի լուր բոլորի ժամկետներ չնշվեն, ապա իր հեղինակությունը դրանից չի տուժի, ամեն ինչ լավ կլինի: Այսինքն՝ ամեն ինչ արվում է հանուն փիառի, այլ ոչ թե հանուն երկրի զարգացման կամ առավել ևս ժողովրդի:

Նիկոլը, սակայն, չի հասկանում, որ հազար ու մի մսուր էլ բացի, ռեյտինգ չի հավաքելու. այն Իլհամն է վաղուց սպառել ու վերականգնել է՛լ չի լինի:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել