Հոկտեմբերի 27-28-ը Հյուսիսային Կորեայից Ռուսաստանի Դաշնություն ուղարկված զինվորականները Մոսկվայի կողմից կօգտագործվեն մարտական գոտիներում։ Նման պնդմամբ է հանդես եկել Ուկրաինայի նախագահ Վլադիմիր Զելենսկին՝ հիմնվելով Ուկրաինայի զինված ուժերի գլխավոր հրամանատար Ալեքսանդր Սիրսկու ներկայացրած զեկույցի վրա։
«Հետախուզական տեղեկատվության համաձայն՝ արդեն հոկտեմբերի 27-28-ը Ռուսաստանի կողմից մարտական գոտիներում կօգտագործվեն Հյուսիսային Կորեայի առաջին զինվորականները։ Սա ակնհայտ էսկալացիոն քայլ է Ռուսաստանի կողմից, որը կարևորություն ունի, ի տարբերություն այն ամբողջ ապատեղեկատվությանը, որն այս օրերին հնչում է Կազանում։ Աշխարհը կարող է հստակ տեսնել, թե իրականում ինչ է ուզում Ռուսաստանը, այն է՝ շարունակել պատերազմը։ Այդ իսկ պատճառով անհրաժեշտ է համաշխարհային առաջնորդների սկզբունքային ու ուժեղ արձագանքը»,- ասել է պետության ղեկավարը։
Զելենսկու խոսքով՝ Հյուսիսային Կորեայի իրական ներգրավվածությանը ռազմական գործողություններին պետք է արձագանքել ոչ թե փակ աչքերով և շփոթված մեկնաբանություններով, այլ շոշափելի ճնշում գործադրել ինչպես Մոսկվայի, այնպես էլ Փհենյանի վրա:
Օրերս ԱՄՆ պաշտպանության նախարար Լլոյդ Օսթինը հաստատել է, որ ԱՄՆ կառավարությունն ապացույցներ ունի, որ Հյուսիսային Կորեան ռազմական ուժեր է ուղարկել Ռուսաստան: Միևնույն ժամանակ Օսթինն ընդգծել է, որ զորքերի ուղարկման նպատակը դեռ պարզ չէ։
Ուկրաինան և Հարավային Կորեան բազմիցս մեղադրել են Հյուսիսային Կորեային Ռուսաստան զորք ուղարկելու համար՝ պատերազմում նրանց օգտագործելու նպատակով: ՆԱՏՕ-ն և ԱՄՆ-ն նախկինում չէին հաստատել զորքերի տեղաշարժը։
«Մեր վերլուծաբանները շարունակում են ուսումնասիրել: Այժմ մենք ապացույցներ ենք տեսնում, որ հյուսիսկորեական զորքերը գնացել են Ռուսաստան: Թե ինչ են անելու, դեռ պարզ չէ: Բայց, այո, կան ապացույցներ, որ Ռուսաստանում ԿԺԴՀ-ի զորքեր կան»,- ասել է Օսթինը:
Պենտագոնի ղեկավարի խոսքով՝ «եթե նրանց մտադրությունն է մասնակցել պատերազմին Ռուսաստանի կողմից, դա շատ, շատ լուրջ խնդիր է»:
Օսթինը նշել է, որ «անհասկանալի է, թե Հյուսիսային Կորեան ինչ կստանա այդ քայլից»:
Պենտագոնի ղեկավարի խոսքով՝ սրանից կարելի է ենթադրել, որ «Ռուսաստանի ռազմական հնարավորությունները թուլացել են և նա ստիպված է դաշնակիցներ Իրանից և Հյուսիսային Կորեայից օգնություն ստանալ»:
«Սա վկայում է այն մասին, որ նա կարող է նույնիսկ ավելի մեծ խնդիրների մեջ լինել, քան շատերն են պատկերացնում», - ասել է Օսթինը՝ նկատի ունենալով ՌԴ նախագահ Վլադիմիր Պուտինին:
