ՄԱԿ-ի մարդու իրավունքների հարցերով գերագույն հանձնակատարի վարչությունը տվյալներ է հրապարակել Ուկրաինայում Ռուսաստանի ռազմական գործողությունների հետևանքով զոհված և տուժած խաղաղ բնակիչների թվի վերաբերյալ։
Սեպտեմբերի 6-ին ներկայացված զեկույցի համաձայն՝ 2022 թ. փետրվարի 24-ից մինչև 2024 թ. օգոստոսի վերջը Ուկրաինայի խաղաղ բնակչության շրջանում վիրավորների թիվը կազմել է առնվազն 24 614, իսկ զոհվածներինը՝ 11 743 մարդ։
«2024 թ. օգոստոսին Ուկրաինայում առնվազն 184 խաղաղ բնակիչ է զոհվել, 856-ը՝ վիրավորվել, ինչն այդ ամիսը դարձնում է 2024 թվականին զոհերի քանակով երկրորդը՝ հուլիսից հետո», – նշում են ամենամսյա զեկույցի հեղինակները։
Նրանց տվյալներով` հուլիսին սպանվել է առնվազն 219 քաղաքացիական անձ և վիրավորվել 1018-ը:Քաղաքացիական բնակչության շրջանում գրանցված տուժածների մեծ թիվը ՄԱԿ-ի մարդու իրավունքների հարցերով գերագույն հանձնակատարի վարչությունը կապում է բազմաթիվ զանգվածային միջադեպերի հետ, որոնք հանգեցրել են զոհերի, մասնավորապես, Դոնեցկի մարզի Կոնստանտինովկա քաղաքում և Խարկովում, ինչպես նաև ամենօրյա գրոհների հետ առաջնագծի մերձակայքում, հատկապես Դոնեցկի մարզում:
