Նիկոլ Փաշինյանի հրաժարականի պահանջով շարժման վարչապետի թեկնածուն Բագրատ Սրբազանը պետք է լինի։
Այս մասին ֆեյսբուքյան իր էջում տեղադրված տեսանյութի մեջ հայտնեց ՀՀ արտաքին գործերի նախկին նախարար Վարդան Օսկանյանը։
«Կարծում եմ, որ Բագրատ սրբազանը ճիշտ ճանապարհի վրա է, երբ երեկ հայտնեց, որ արդեն խորհրդակցությունների մեջ է խորհրդարանական քաղաքական ուժերի հետ, որպեսզի մտնեն ԱԺ և անվստահություն հայտնելու գործընթաց սկսեն Փաշինյանի նկատմամբ։ Սահմանադրությունը, իհարկե, պահանջում է, որպեսզի այդ ուժերը նաև ներկայացնեն իրենց վարչապետի թեկնածուին։ Այս պահի դրությամբ, կարծում եմ՝ այդ վարչապետի թեկնածուն հենց Բագրատ Սրբազանը պետք է լինի։ Չեմ տիրապետում մանրամասներին, բայց կարծում եմ, որ այդպես կլինի, որովհետև այս կառավարությունը լինելու է ժամանակավոր, մի տարվա միգուցե»,- ընգծեց Վարդան Օսկանյանը։
Նրա դիտարկմամբ՝ այդ ընթացքում կկարգավորվեն որոշ խնդիրներ, հայ ժողովուրդը իր մեջքը կշտկի, դրանից հետո հնարավոր կլինի անցկացնել արդար ընտրություններ։ Իրոք, այս անցումային շրջանի համար ամենահարմար թեկնածուն այդ մարդն է, որը սկսել է այս ամենը, իր գործով ցույց է տվել, որ ինքը նվիրում ունի և վճռական է այս նպատակներն իրականացնելու հարցում։
«Կոչ եմ անում ժողովրդին, որ լինի հետևողական, յուրաքանչյուրս պետք է լինենք Բագրատ Սրբազանի զինվորը, իրականացնենք այն, ինչ մեր առաջ դնելու է։ Նա խոհեմ ձևով կկառավարի այս ամբողջ գործընթացը։ Ժամանակն է, որ ՔՊ-ականները վերանայեն ամեն բան և իրենց մեջ ուժ գտնեն օգտվելու Սահմանադրությամբ իրենց ընձեռված հնարավորությունից, քանի որ նրանք քվեարկելու են իրենց խղճով»,- նշեց Վարդան Օսկանյանը։
