Civilnet.am-ը գրում է.
Խրամորթում Պաշտպանության բանակի զինծառայողները պատրաստ են դիմակայելու Ադրբեջանի հնարավոր սադրանքներին, տեղի բնակիչները ևս ինքնապաշտպանական ջոկատ են ստեղծել․ այս մասին հաղորդել է civilnet.am-ի թղթակից Հայկ Ղազարյանը Խրամորթից։
Ըստ Ղազարյանի՝ ադրբեջանցիները Փառուխ գյուղի ուղղությամբ առաջ են շարժվել և իրենց վերահսկողության տակ են վերցրել որոշ կետեր․ «Բարձունք են վերցրել, որը գերակա դիրք ունի հարակից գյուղերի՝ Նորագյուղի, Խնաբադի նկատմամբ»։
Իր հերթին Արցախի տեղեկատվական շտաբը հաղորդել է, որ խաղաղապահները իրենց հենակետերում են, բանակցությունները շարունակվում են։
«Տեղեկացնում ենք, որ Ասկերանի շրջանի Փառուխ և Խրամորթ բնակավայրերի ուղղությամբ շփման գծի պահպանությունը և այդ համայնքներում ապրող խաղաղ բնակչության անվտանգության ապահովումը գտնվում է Արցախի Հանրապետությունում տեղակայված ռուսական խաղաղապահ զորակազմի առաքելության տիրույթում»,- հաղորդում է Արցախի տեղեկատվական շտաբը։
