Ռուսաստանի ԱԳՆ պաշտոնական ներկայացուցիչ Մարիա Զախարովան «Գովորիտ Մոսկվա» ռադիոյին մեկնաբանել է ՌԴ նախագահ Վլադիմիր Պուտինին ուղղված վրացի հեռուստամեկնաբան Գեորգի Գաբունիայի արտահայտությունները:
«Սա Վրաստանի դժբախտությունն է»,- ասել է նա:
Կիրակի օրը Գաբունիան վրացական «Ռուսթավի-2» հեռուստաալիքի իր հեղինակային ծրագրում վիրավորական արտահայտություններ է արել Պուտինի հասցեին՝ ակտիվորեն անպարկեշտ բառապաշար օգտագործելով:
Ավելի ուշ բողոքի ակցիաներ են սկսվել հեռուստաընկերության գրասենյակի մոտ, որի մասնակիցները պահանջել են աշխատանքից հեռացնել լրագրողին. հեռուստաալիքը ժամանակավորապես դադարեցրել է հեռարձակումը:
Երկրի կառավարությունը նույնպես դատապարտել է հեռուստամեկնաբանի հայտարարությունները:
«Այն, ինչ այսօր տեսանք «Ռուսթավի-2»-ում, ոչ այլ ինչ է, քան սադրանքի ամոթալի արտահայտություն և երկրում իրավիճակի ապակայունացման փորձ: Դա բացարձակապես անընդունելի է»,- գրել է Վրաստանի վարչապետ Մամուկա Բախտաձեն Twitter-ում:
Նա ընդգծել է, որ երկրի շահերն ագրեսիվ չեն և ուղղված չեն Վրաստանի և Ռուսաստանի միջև հարաբերությունների ապակայունացմանը:
