Civilnet.am-ը գրում է.
Ադրբեջանի արտգործնախարարությունը արձագանքել է Հայաստանի վարչապետ Նիկոլ Փաշինյանի հայտարարությանը, որ Հայաստանը չի կարող քննարկել «տարածքներ ստատուսի դիմաց» բանաձևը։
«Նիկոլ Փաշինյանի տրամաբանությունը դժվար է հասկանալ։ Ինչպես հայտնի է, ԵԱՀԿ Մինսկի խմբի հովանո ներքո ընթացող ղարաբաղյան խնդրի կարգավորման բանակցությունների հիմքում ընկած է հենց հայկական ուժերի դուրսբերումը Ադրբեջանի գրավյալ տարածքներից։ Այդ դեպքում հարց է առաջանում՝ պարոն Փաշինյանի այդ հայտարարությունն արդյոք նշանակո՞ւմ է հրաժարում բանակցություններից»,- ասված է հայտարարությունում։
Հունվարի 30-ին լրագրողների հետ ճեպազրույցում Հայաստանի վարչապետ Նիկոլ Փաշինյանը, ի պատասխան դիտարկման, թե բանակցություններում քննարկվում է «տարածքներ ստատուսի դիմաց» թեզը, ասել էր․
«Մենք ընդհանրապես չենք կարող քննարկել, նույնիսկ քննարկել տարածքներ խաղաղության դիմաց բանաձևը… »։
