Օուեն Մաստերսոնը մեկ տարեկան տղա է Սփրինգֆիլդից, ԱՄՆ, որը ծնվել է առանց գանգի։ Տղայի ծնողներն իրենց պատմությամբ կիսվել են Springfield News-Leader պարբերականի հետ։ Ակալվարիան զարգացման հազվադեպ արատ է, որի դեպքում բացակայում են գանգի միացման ոսկորները, ուղեղի ամուր թաղանթը և դրանց հետ կապված մկանները, սակայն առկա է գանգի հիմքը և դիմային ոսկորները (Օուենի դեպքում հոնքերից վերև ոսկրային հյուսվածքները բացակայում են)։
Երբ հղիության 24 շաբաթում ՈՒՁՀ–ից հետո բժիշկը բացատրել է Ջեսիկային և Թոմ Մաստերսոնին, որ պտուղը զուրկ է գանգից, և ամենայն հավանականությամբ, ուղեղի զարգացման խնդիրներ էլ կարող են լինել, Թոմն ուշագնաց է եղել։ Բժիշկներն առաջարկել են Ջեսիկային հրաժարվել պտղից, սակայն նա չի համաձայնել։
Օուենը ծնվել է 2017 թվականի սեպտեմբերի 13-ին։ «Նա լաց եղավ, և մենք անսահման երջանիկ էինք»,– պատմում է Ջեսիկան։ Ամուսինները հրաժեշտ են տվել Օուենին հանդիպումից անմիջապես հետո։ Մոր խոսքերով՝ նրանք վախենում էին, որ նրա հետ անցկացրած ամեն մի րոպեն վերջինն է լինելու։ Սակայն րոպեներն անցնում էին, իսկ Օուենի հետ ամեն բան կարգին էր։
Այժմ Օուենը սննդաբանի, լոգոպեդի, վնասվածքաբանի և մանկաբույժ-նյարդաբանի հսկողության տակ է։ Նա չի կարողանում կարգին շարժվել, սողալ, նստել, գլորվել։ Նրան հատուկ սարքավորում է անհրաժեշտ դրա համար։ Օուենի լսողությունն ու տեսողությունը կարգին են։ Նա ժպտում է, ծիծաղում, փորձում է կրկնել ծանոթ ձայները։ «Իհարկե, այս ամենը շատ բարդ է, սակայն ես ոչինչ չէի ցանկանա փոխել։ Ես սիրում եմ նրան այնպիսին, ինչպիսին նա կա»,– ասում է Օուենի մայրը։
