Հավասարակշռված մակրոտնտեսական քաղաքականությունը, ինֆլյացիայի ցածր մակարդակը և առևտրի համար բարենպաստ պայմանների առկայությունը կնպաստեն Հայաստանի տնտեսական զարգացմանը, իսկ ՀՆԱ իրական աճը 2018թ․-ին կանխատեսվում է 5.3%-ի սահմաններում: Այս մասին ասված է Համաշխարհային բանկի կողմից հրապարակված «Հայաստանի մակրոտնտեսական զարգացումը» հոկտեմբերյան զեկույցում: Նշենք, որ նախորդ կանխատեսմամբ 2018թ․-ին Հայաստանի տնտեսական աճը գնահատվում էր 4.1%:
Զեկույցի գնահատականների համաձայն՝ ընթացիկ տարում տնտեսական աճին նպաստող գլխավոր ոլորտները լինելու են ծառայությունների ոլորտը՝ 6.3% և արդյունաբերությունը՝ 5%, իսկ գյուղատնտեսության աճը կկազմի 2.5%:
«2018թ-ի ապրիլ-մայիս ամիսներին տեղի ունեցած խաղաղ հեղափոխությունը չի խաթարել Հայաստանի մակրոտնտեսական ցուցանիշների դրական միտումները: 2018թ-ի առաջին կիսամյակում տնտեսությունն աճել է 8.3%-ով: Իրական աշխատավարձի աճը, գործազրկության կրճատումը և դրամական փոխանցումների աճը խթանում են սպառման ծավալների մեծացմանը և աղքատության կրճատմանը»,- ասված է ՀԲ զեկույցում:
Նշենք, որ Արժույթի միջազգային հիմնադրամի կողմից հոկտեմբեր ամսին հրապարակված նոր կանխատեսումների համաձայն ևս՝ Հայաստանի տնտեսական աճի գնահատականները բարելավվել էին՝ 3.4%-ից բարձրանալով մինչև 6%:
Հայաստանի ԱՎԿ տվյալների համաձայն՝ հունվար-սեպտեմբեր ամիսներին տնտեսական ակտիվության ցուցանիշը կազմել է 6.5%, իսկ նախորդ տարի նույն ցուցանիշը կազմել էր 5%: Հայաստանի Կենտրոնական բանկը ևս բարելավել է սպասվող տնտեսական աճի կանխատեսումների միջակայքը՝ 4.6-6.5%-ի փոխարեն կանխատեսելով 5.6-6.9%:
