Վայրի, կուսական բնություն, գահավիժող ջրվեժներ, անմոռանալի մայրամուտներ, անվերջանալի թվացող խորը ձորեր. դերասանուհի, հաղորդավարուհի Լիլիթ Հարոյանն իր համար հենց այսպիսի ճանապարհորդություն է կազմակերպել: Լիլիթն արդեն 6 ամիս է՝ շրջագայում է ու բացահայտում ասիական մշակույթը: Տպավորիչ ու էկզոտիկ հանգստի մանրամասներով նա առաջինը կիսվել է BlogNews.am-ի հետ:
Պարզվում է՝ դերասանուհու համար աշխատանքային տարին ոչ միայն ավարտված է, այլև, կարելի է ասել, որ չի էլ սկսվել, քանի որ Լիլիթը հենց տարվա սկզբին՝ հունվարից է սկսել ճանապարհորդել, երբ ATV հեռուստաընկերությամբ փակվեց «I առավոտ» ժամանցային ծրագիրը. «Սկզբում որոշել էի չհրապարակայնացնել ճանապարհորդությունս, սակայն երբ հասկացա, թե որքան շատ մարդկանց կարող եմ ոգեշնչել` ճանապարհորդելու, տեսնելու տարբերվող մշակույթ, բնություն և գյուղեր ու քաղաքներ, զգացի, թե որքան բարձր է սրտիս թրթիռը, որոշեցի կիսվել ու մարդկանց ծանոթացնել մեկ այլ աշխարհի հետ»,- ասում է Լիլիթը:
Դերասանուհին շրջագայությունը սկսել է մտերիմ ընկերուհու հետ, իսկ այժմ մենակ է վայելում հանգիստը. «Այս պահին ամառային հանգիստս անցկացնում եմ Ինդոնեզիայում գտնվող հրաշք Բալի կզղում: Արդեն հասցրել եմ տարբեր ազգերի և մշակույթների, տարբեր աշխարհայացքների շատ ընկերներ ձեռք բերել, ինչը շատ հետաքրքիր է և ուսուցանող, քանի որ բոլորից ինչ-որ բան սովորում ես: Այս տարի հասցրել եմ գնալ Հնդկաստան, Թաիլանդ և Ինդոնեզիա»,- նշում է Լիլիթն ու հավելում, որ ակտիվ հանգստի կողմնակից է: Առավոտյան շատ վաղ է արթնանում, հայտնաբերում տեսարժան վայրերն ու սրտատրոփ վազում դուրս:
Ինչպես գիտենք, դերասանուհու համար վաղուց յոգան տարերք ու ապրելաոճ է դարձել, ու Լիլիթը չի մոռացել ճանապարհորդության ընթացքում հաճելին համատեղել օգտակարի հետ. «Այս ընթացքում միանշանակ զբաղվում եմ յոգայով յոգայի մոտակա կենտրոններում (ի դեպ, ասեմ, որ այստեղ շատ կան յոգայի կենտրոններ), պարով և այլն: Այստեղ արդեն հասցրել եմ աշխատել` դասավանդելով յոգա: Գումարային տեսակետից շատ ավելի ապահով է լինում, երբ ճանապարհորդելու ընթացքում գտնում ես որևէ գործ, իմ պարագայում` յոգայի դասավանդում, և աշխատում թեկուզ օրը 1-2 ժամ»:
Լիլիթին տպավորել է այն ամենն, ինչն այս ընթացքում հասցրել է տեսնել. «Տեսել եմ բնություն, վայրի, կուսական բնություն, զգացել եմ դրա շունչն ու հզորությունը, տեսել եմ գահավիժող ջրվեժներ, անմոռանալի մայրամուտներ, անվերջանալի թվացող խորը ձորեր, շինություններ, որոնց ճարտարապետությունը հիմնովին տարբերվում է մեր կառույցներից, դիզայն ու ձևավորում, որը բնորոշ է միայն այս կղզուն: Էլ չեմ ասում համեղ ուտեստների մասին: Անմոռանալի օրեր են»:
28-ամյա դերասանուհին հաճախ է ճանապարհորդում, բազում երկրներում է հասցրել լինել: Լիլիթից նաև հետաքրքրվեցինք՝ ո՞րն է առաջին իրը, որը սովորաբար վերցնում է իր հետ ճամպրուկները դասավորելիս. «Այս անգամ որոշեցի ճանապարհորդել մի ուսապարկով, շատ թեթև, այնպես որ, շատ քիչ իրեր ունեմ, միայն ամենաանհրաժեշտ բաները: Առաջին իրը, որ վերցնում եմ, հեռախոսիս մարտկոցն է: Հեռախոսն անհրաժեշտ է ծնողներիս, հարազատներիս և ընկերներիս հետ միշտ կապի մեջ լինելու, ինչպես նաև այցելած երկրի մասին անհրաժեշտ տեղեկությունը կարդալու, տեսարժան վայրերը հայտնաբերելու և, ինչու չէ, լուսա- կամ տեսանկարահանվելու համար: Ասեմ, որ շատ նկարներ չունեմ, քանի որ այնքան գեղեցիկ է ամեն ինչ շուրջս, այնքան տարված եմ լինում, որ նույնիսկ նկարվելու մասին չեմ էլ հասցնում մտածել»,- եզրափակեց Լիլիթը: