Tert.am-ը գրում է.
Իրավաբանական գիտությունների թեկնածու Արամ Վարդևանյանի խոսքով՝ ՀՀ նախագահ Արմեն Սարգսյանի կողմից Սահմանադրական դատարան դիմելը՝ ՍԴ դատավորի թեկնածու առաջադրելու իրավական ակտերի՝ Սահմանադրությանը համապատասխանությունը պարզելու նպատակով, ողջունելի է:
Նա Tert.am-ի հետ զրույցում նշեց, որ ՀՀ նախագահը 1995 թվականից ի վեր ունեցել է իրավական ակտերի՝ Սահմանադրությանը համապատասխանության վիճարկման վերաբերյալ Սահմանադրական դատարան դիմում ներկայացնելու լիազորություն, սակայն իրավական ակտերի մասով մինչ այժմ այդ լիազորությունը չի կիրառվել:
«Այսօր մենք ականատեսն ենք դառնում նախագահի լիազորությունների կիրառմանը: Սա նոր մշակույթի կիրառում է: Այդ իսկ պատճառով շատ կարևորում եմ այդ գործընթացը»,- ասաց նա՝ նշելով, որ նախկինում Սահմանադրական դատարանի դատավորի ընտրության ժամկետների հետ կապված խնդիրներ չէին առաջացել, քանի որ խնդրին չէին բախվել, հիմա կա իրողությունների և իրավիճակի փոփոխություն:
Հիշեցնենք, որ վերջին շրջանում տարբեր մասնագիտական քննարկումներ ծավալվեցին Սահմանադրական դատարանի դատավորի թեկնածու առաջադրելու գործընթացի մանրամասների և ժամկետների վերաբերյալ: ՀՀ Սահմանադրությամբ՝ Սահմանադրական դատարանի դատավորների թեկնածուների ընտրության և առաջադրման մանրամասները, այդ թվում՝ ժամկետներ սահմանված չեն, և դրանց սահմանումը սահմանադիրը հստակ վերապահել է երկու իրավական ակտերի, այն է՝ «Սահմանադրական դատարանի մասին» Հայաստանի Հանրապետության սահմանադրական օրենքին և Հայաստանի Հանրապետության դատական օրենսգրքին:
ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունն այսօր տեղեկատվություն է տարածել, ըստ որի՝ ՀՀ նախագահը, իրեն վերապահված լիազորություններով ՀՀ դիմել է Սահմանադրական դատարան՝ նշված իրավական ակտերի՝ Սահմանադրությանը համապատասխանությունը պարզելու նպատակով:
Ամբողջական հոդվածը կարող եք կարդալ այստեղ։
