Իրանի արտաքին գերատեսչության համակարգում տեղի ունեցած կառուցվածքային փոփոխությունների շրջանակներում փոխվել է նաև արտգործնախարարության ղեկավար կազմը: Արտգործնախարար Զարիֆն ԱԳՆ-ի աշխատակազմին է ներկայացրել է իր նոր տեղակալներին և խորհրդականներին:
Նախկինում Իրանի ԱԳ նախարարի երեք տեղակալներից յուրաքանչյուրը մի տարածաշրջան էր համակարգում: Այժմ դրանք համակարգելու է քաղաքական հարցերով տեղակալը, այդ պաշտոնում նշանակվել է Սեյյեդ Աբբաս Արաղչին: 
Կառուցվածքային փոփոխությունների շրջանակներում առանձնացվել է տնտեսական հարցերով փոխնախարարի պաշտոնը, որը վերապահվել է ներկայում Հնդկաստանում ԻԻՀ դեսպան Ղոլամռեզա Անսարիին, իսկ Ղոլամհոսեյն Դեհղանին և Հոսեյն Փանահի Ազարը համապատասխանաբար նշանակվել են իրավական և միջազգային հարցերով և խորհրդարանի և իրանցիների հարցերով տեղակալներ, Մորթեզա Սարմադին էլ կլինի Զարիֆի մյուս տեղակալը: ԱԳՆ մամուլի խոսնակի պաշտոնը կրկին վերապահվել է Բահրամ Ղասեմիին, որը միաժամանակ կղեկավարի նաև Հանրային դիվանագիտության կենտրոնը:
Մոհամմադ Քազեմ Սաջադ Փուրն էլ նշանակվել է ԱԳՆ միջազգային և քաղաքական հետազոտությունների կենտրոնի ղեկավար: 
Հոսեյն Ջաբերի Անսարին նշանակվել է ԱԳ նախարարի քաղաքական հատուկ հարցերով ավագ օգնական, իսկ Հասան Ղաշղավին՝ խորհրդական: 
Վերոնշյալ անձինք իրենց պարտականություններին կանցնեն փետրվարի 21-ից:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել