Տասը տարի ընդմիջումից հետո Հայկոն կրկին Կարեն Դեմիրճյանի անվան մարզահամերգային համալիրի բեմում էր՝ իր «Սիրո հավերժ քաղաք» խորագիրը կրող մենահամերգով: Լեփ-լեցուն դահլիճը, Հայկոյի երկրպագուները և շոու բիզնեսի ներկայացուցիչները՝ Սիրուշոն, Լևոն Քոչարյանը, Սյուզան Մարգարյանը, Հրաչյա Հարությունյանը, Ավետ Բարսեղյանը, Նազենի Հովհաննիսյանը, Սոֆի Մխեյանը, Էրիկը և Սվետլանան, Ալեքսանդր Բաբասյանը՝ կնոջ հետ, Արամ mp3-ը՝ կնոջ հետ, Խորեն Լևոնյանը, եկել էին լսելու երգչի հին և սիրված երևանյան ռոմանսները: BlogNews.am-ը ներկայացնում է մենահամերգի հետաքրքիր դրվագները:
«Չեք պատկերացնի՝ ինչ երջանիկ եմ, երբ բեմից նայում եմ ձեզ և վստահ եմ՝ յուրաքանչյուր արտիստ կուզեր տեսնել այս տեսարանը՝ տեսնել այն մարդկանց, ովքեր երկար են սպասել այս օրվան: Ես ուզում եմ, որ դուք տեղափոխվեք իմ երաժշտական աշխարհ»,- երկու երգից հետո այսպես ողջունեց հանդիսատեսին Հայկոն։
Մոտ երկուսուկես ժամ տևողությամբ համերգի ժամանակ հանդիսատեսը յուրաքանչյուր երգի հետ էկրաններին փոքրիկ ֆիլմ-պատմություն էր տեսնում, որի մտահղացման հեղինակը Հրաչ Քեշիշյանն էր, ով, ի դեպ, համերգի ռեժիսորն էր:
Հայկոն 99 թվականին թողարկեց իր «Ռոմանս» ձայներիզը, ինչը երգչի համար այցեքարտ դարձավ: Այդ ընթացքում նա ամբողջ աշխարհով շրջագայեց և բազմաթիվ համերգներ ունեցավ: Երեկոյի ընթացքում հանդիսատեսի համար ձայնասկավառակի երգերից մի քանիսը կատարեց: Սիրված են նաև երգչի դուետները, որոնցից երեքը երեկոյի ընթացքում կատարեց Քրիստինե Պեպելյանի, Ռազմիկ Ամյանի և Հռիփսիմե Հակոբյանի հետ:
«Ֆիլմերի սաունդրեքները իմ ստեղծագործական կյանքում առանձնահատուկ տեղ ունեն: Արդեն տասը տարի է անցել «Ոչինչ չի մնա» ֆիլմից, որի երաժշտությունը վստահեցին ինձ: Դա էլ դարձավ հիմք և այցեքարտ, որ շարունակեմ աշխատել ֆիլմերի սաունդրեքների վրա»,- նշեց Հայկոն։
Երգչի համերգն ավարտվեց վերջերս թողարկած «Սիրո հավերժ քաղաք» երգով, որն, ի դեպ, երկու անգամ կատարեց, որի ժամանակ էլ բեմ բարձրացավ որդին՝ Արմանը: