Tert.am-ը գրում է.
ՀՀԿ ԱԺ պատգամավոր Կարեն Բեքարյանը Tert.am-ի հետ զրույցում անդրադարձավ Վիեննայում նախատեսվող Սարգսյան-Ալիև հանդիպմանը՝ բացառելով, որ հանդիպման դեպքում խոսք գնա բանակցային գործընթացի կանոնակարգման մասին: «Եթե հանդիպումը լինի էլ՝ նրա առաջնային խնդիրը, օրակարգը պետք է կապված լինի 1994-1995թթ.-ի զինադադարի պայմանագրերի ռեժիմի պահպանման հետ: Հնարավոր է զինադադարի ապահովման էլեմենտների ուժեղացման հետ մեկտեղ ներդրվի վստահության միջոցների տեղակայում և ոչ ավելին»,- ասաց նա:
-Պարոն Բեքարյան, նախագահի գլխավորած պատվիրակությունն արդեն իսկ ժամանել է Վիեննա, նախատեսվում է Սարգսյան-Ալիև հանդիպում, ի՞նչ ակնկալիքներ կարելի է ունենալ հարցի կարգավորման շուրջ:
-Եթե հանդիպումը տեղի ունենա՝ չեմ կարծում, թե մեծ ակնկալիքների հարց կարող է առաջանալ։ Գիտեք ինչ լարված է իրավիճակը, ինչ է տեղի ունեցել, և ես բացառում եմ, որ հանդիպման պարագայում խոսք գնա բանակցային գործընթացի կանոնակարգման մասին: Եթե հանդիպումը լինի էլ, ապա նրա առաջնային խնդիրը, օրակարգը պետք է կապված լինի 1994-1995թթ-ի զինադադարի պայմանագրերի ռեժիմի պահպանման հետ: Հնարավոր է զինադադարի ապահովման էլեմենտների ուժեղացման հետ մեկտեղ ներդրվի վստահության միջոցների տեղակայում և ոչ ավելին:
-Միջնորդ կողմերից նաև առաջարկություն էր եղել վերահսկողության մեխանիզմների տեղադրում, որին Ադրբեջանը միակողմանի դեմ է, գոնե այդ արդյունքը կապահովվի՞, ըստ Ձեզ:
-Վստահորեն ասել, որ Ադրբեջանն այսօր կհամաձայնի՝ չեմ կարող ասել, բարդ է։ Սա արդեն գալիս է համանախագահ երկրների միասնական կամքից, եթե կամք լինի և Ադրբեջանի վրա հստակ միասնական ճնշում լինի ՝ չեմ բացառում, որ այդ համաձայնությանը գան: Եթե ուղղակի առկա լարվածությանը բեռնաթափելու կոսմետիկ հայտարարություն լինի, չեմ կարծում, որ ինչ-որ ձևով հաջողություն արձանագրվի:
-Համաձա՞յն եք այն դիտարկման հետ, որ Հայաստանն ավելի ուժեղ դիրքերից է հանդիպմանը գնում՝ հաշվի առնելով, որ Ադրբեջանը ներկայանում է որպես ագրեսոր:
-Իմ կարծիքով, եթե հանգիստ թողնենք ֆրանսիական կողմին, և՛ ՌԴ-ն, և՛ ԱՄՆ-ն շատ լավ տեղյակ են իրական դեպքերի ընթացքին, որ այս ամենը սանձազերծվեց Ադրբեջանի կողմից, հետևաբար չեմ կարծում, որ այնտեղ որևէ մեկին դա բացատրելու կամ համոզելու կարիք կա: Իմ ներքին համոզմամբ՝ նրանք շատ լավ պատկերացնում են, շատ լավ գիտեն, հետևաբար ստեղծված լարվածության, եղած զոհերի ու այս ամբողջ իրավիճակի պատասխանատուն հստակ պարզ է: Երբ մենք անդրադառնում ենք, թե սա ինչի պետք է բերի, անկախ նրանից, թե ինչ կհայտարարվի հանրային մակարդակով, տրամաբանությունը հուշում է, որ կարգի հրավիրման գործընթացը պետք է լինի Ադրբեջանին ուղղված: Հայաստանի ուժեղ դիրքը հենց այն է, որ Հայաստանը չի եղել պրովոկացիա անողը, ԼՂՀ-ն չի եղել պրովոկացիա անողը, և բնականաբար այդ պարագայում դիրքերն էլ ուժեղ են, հստակ երևում է՝ Ադրբեջանը տարածաշրջանում կայունությունը դրել է հարցականի տակ:
-Պարոն Բեքարյան, ապրիլյան պատերազմից հետո հայկական կողմը ԼՂՀ-ի մասնակցությունը գործընթացին կարևորում էր: Ստացվում է, որ Վիեննա ենք գնում առանց ԼՂՀ-ի և այս հարցում չե՞ք կարծում, որ զիջում ենք:
-Նախ ՀՀ-ն մշտապես է ասել՝ ԼՂՀ-ի մասնակցությունը ձևաչափին ձախողված վիճակից կբերի նորմալ վիճակի, դա նոր բան չէ, ինչ վերաբերում է ապրիլյան պատերազմին, ևս մեկ անգամ ապացուցվեց, որ ԼՂՀ-ի մասնակցությունը ոչ միայն ճիշտ է, այլև անհրաժեշտ, որովհետև նույն ագրեսիան ԼՂՀ-ն զգաց իր վրա: Բայց այսօրվա հանդիպման հետ ես այս խնդիրը չէի կապի, եթե հարցին մոտենանք համանախագահների պատկերացումներով՝ նրանց խնդիրն է, ինչ-որ կապ վերականգնել, ստարտ տալ գործընթացին: Ինչպես ասացի, բացառում եմ ընդհանրապես, որ այսօր խոսակցություն լինի գործընթացի կարգավորման վերաբերյալ, հետևաբար երբ դու ստարտի խնդիր ես լուծում և լիցքաթափման խնդիր ես լուծում, ավելի գլոբալ վիճակ չես նախաձեռնի։ Վիճակը, մեղմ ասած, արդեն իսկ անկայուն է, հետևաբար իրար հետ չէի կապի։ Իսկ այն, որ ՀՀ-ն շարունակելու է պնդել ԼՂՀ մասնակցությունը՝ կասկած չունեմ:
-Հանդիպումը համանախագահների ջանքերով է կազմակերպվել և այս դեպքում կարո՞ղ ենք ասել, որ Միացյալ Նահանգները հարցի կարգավորման նախաձեռնությունը ՌԴ-ից վերցնում է իր ձեռքը, քանի որ հայտնի է, որ ԱՄՆ պետքարտուղար Ջոն Քերին ևս մասնակցելու է Վիեննայում ԼՂ հակամարտության շուրջ քննարկումներին:
- Չէ, համանախագահները մշտապես ունեցել են իրենց ներգրավվածությունը և այնպես չէ, որ հետ էին քաշված և հիմա նորից վերադառնում են: Եղել են ինչ-որ փուլեր, որտեղ ՌԴ-ի նախաձեռնությունն ավելի բարձր է եղել: Հիմա սա նշանակում է, որ համանախագահները միասնական են փորձում այս լարվածությունը թուլացնել։ Սա պահի լրջության պատկերացումից բխող միասնական նախաձեռնություն է, չեմ տեսնում առանձին կողմինը՝ ամերիկյան, կամ ռուսական, կամ ֆրանսիական:
-Պարոն Բեքարյան երկու օր առաջ Նախիջևանի կողմից հայ զինվորի կորուստ ունեցանք, կրկին նույն շրջափուլո՞ւմ ենք, երբ կարևոր հանդիպումներից առաջ Ադրբեջանը սրում է իրավիճակը:
-Այստեղ երկու հարց կա. մի կողմից ապրիլյան քառօրյա պատերազմի հետագիծն է և երկրորդն այն է, որ տարիներ շարունակ Ադրբեջանի ձեռագիրն է եղել լուրջ հանդիպումից առաջ իրավիճակն առավել սրել: Որքան էլ ցավալի է, մենք պետք իրերը կոչենք իրենց անուններով, մենք գտնվում ենք պատերազմի մեջ և գոնե այսօրվա իրավիճակով զարմանալ այդ սրացման տարբեր էլեմենտների վրա, երևի թե չարժե: Մենք գտնվում ենք չհայտարարված պատերազմի մեջ:
