email մարկետինգԷլեկտրոնային նամակը կիրառվում է համացանցի զարգացման ամենասկզբից, բայց չնայած դրան՝ այն շարունակում է մնալ ամենաշատ օգտագործվող և ամենաարդյունավետ վաճառքի, բրենդի առաջխաղացման ու հաղորդակցման ձևերից մեկը:

Քանի որ հասարակությունում ընդունված է e-mal մարկետինգն ընկալել որպես սպամի դրսևորումներից մեկը, սկսենք պնդումից, որ e-mail մարկետինգը սպամ չէ, e-mail մարկետինգը «рассилка» չէ, e-mail մարկետինգը միակողմանի հաղորդակցություն չէ: Եթե փորձենք երեք բառով բնորոշել e-mail մարկետինգը, ապա այդ բառերը կլինեն` «հարգանք», «տվյալների բազա», «օգտակարություն»:

e-mail մարկետինգը ձևավորվել է համացանցի զանգվածայնացմանը զուգահեռ, սակայն ժամանակի ընթացքում շատերի կողմից բացասական ընկալվող գործիքի է վերածվել, որովհետև շատ ըներություններ ու անհատներ e-mail մարկետինգն օգտագործում են սպամի սկզբունքներով, այսինքն` հաճախորդի հասցեն ավելացնում են առանց նրա իմացության, հաճախորդին մանիպուլացնում են, հետադարձ կոնտակտին ուշադրություն չեն դարձնում և այլն: E-mail մարկետինգը լոյալությունն է ավելացնում, սպամը` հակակրանքը:

e-mail մարկետինգի 5 սկզբունք`

եթե e-mail մարկետինգի իրականացման կանոնները պահպանվեն ու պրոֆեսիոնալ մոտեցում ցուցաբերվի, ապա այն կարող է վերածվել շատ արդյունավետ մարկետինգային գործիքի: Ստորև թվարկում ենք e-mail մարկետինգի հիմնական սկզբունքները.

  1. Էլեկտրոնային հասցեները պետք է հավաքվեն միայն հաճախորդների իմացությամբ ու նրանց ցանկությամբ: Գողացված էլեկտրոնային հասցեների օգտագործումը հակասում է e-mail մարկետինգի սկզբունքներին: Այս գործում ամենակարևորը վստահությունն է, իսկ վստահություն շահել հնարավոր չէ, եթե հաճախորդի տվյալներն օգտագործում եք առանց նրա համաձայնության: Հասցեները կարելի է ստանալ կայքում բաժանորդագրության դիմաց, ապրանքը գնելիս խնդրել հաճախորդին, որ լրացնի իր տվյալները (պարտադիր ասելով, թե ինչի համար են պետք) և այլն: Ինձ մոտ եղել են դեպքեր, երբ էլեկտրոնային հասցեներ էի հավաքել թիրախային լսարանից (վերցնում էի այն անձանց էլեկտրոնային հասցեները, ովքեր սոցիալական ցանցերում գրանցվել էին իմ պրոդուկտի ոլորտի այլ միջոցառումներին), սակայն նամակն ուղարկելուց հետո միևնույն է բացասական արձագանքներ էի ստանում, քանի որ բաժանորդագրվածները չգիտեին, թե ինչ գործ ունեն իմ հաղորդագրությունների հետ: Այնպես որ շատ կարևոր է տվյալները վերցրեք միայն հաճախորդի համաձայնությամբ:
  2. E-mail մարկետինգի բովանդակության 80 տոկոսը հաճախորդի համար հետաքրքիր, կարևոր տեղեկատվություն պետք է լինի, և միայն 20 տոկոսը` գովազդ: Հետաքրքիր տեղեկատվությունը կարող է լինել Ձեր ապրանքի ոլորտի հետ կապված նորարարությունների, խնդիրների լուծման տարբերակների, օրենսդրական փոփոխությունների և այլնի մասին: Պոտենցիալ հաճախորդի համար հետաքրիր տեղեկատվությունը ներկայացնելուց հետո (կամ ընթացքում) նոր ներկայացվում է գովազդային առաջարկը: Քանի որ գովազդային առաջարկը կարող է երկար ներկայացնելու կարիք ունենալ, ապա ավելի լավ է այն գրել առանձին էջում, իսկ էլեկտրոնային նամակում մի փոքր նկարագրություն անել ու հղում տեղադրել նմանատիպ նախաբանով`«մանրամասներին ծանոթանալ ցանկացողներն անցնեն հետևյալ հղումով»:
  3. E-mail մարկետինգը հաճախորդի հետ երկարաժամկետ հարաբերությունների գործիք է, որի գլխավոր նպատակը թիրախային խմբին երկրորդային վաճառք անելը կամ մշտական հաճախորդ դարձնելն է: Հետևաբար e-mail մարկետինգն իր բովանդակությամբ պետք է խրախուսի երկարաժամկետ հարաբերությունների ձևավորմանը, ոչ թե միայն կարճաժամկետ ակցիաների մասին հաղորդագրություններ տարածի:
  4. E-mail մարկետինգի համար նախատեսված նամակը պետք է այնպես գրվի, ինչպես ընկերոջն ուղարկվող նամակն է: e-mail մարկետինգում գլխավորը ոչ թե վաճառելն է, այլ վստահություն շահելը, եթե վստահություն շահեք, վաճառքն արդեն մեխանիկորեն է լինելու: Հետևաբար նամակի տակը պետք է նշված լինի ոչ թե ընկերության, այլ կոնկրետ ինչ-որ անձի անունը, կոնտակտները:
  5. E-mail մարկետինգը բարդ ու երկար տեքստեր չպետք է ունենա: Այն բաղկացած է ոչ թե երկար տեքստերից, այլ մի քանի համառոտ պարբերություններից ու հղումներից, որ ավելի մանրամասն ծանոթանալ ցանկացողը կարողանա կարդալ: Պետք է նկատի ունենալ, որ կարդացողները հնարավոր է՝ սմարթֆոնով են կարդում, իսկ սմարթֆոնով երկար տեքստեր կարդալը դժվար է:

Շարունակությունն՝ այստեղ

Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print Տպել