Tert.am-ը գրում է.
Հայաստանը պետք է խնդիրներ չունենա Ռուսաստանի հետ՝ անվտանգությանը վերաբերող հարցերում, բայց, միաժամանակ, լայն տնտեսական հարաբերություններ ունենա Արևմուտքի հետ:
Tert.am-ի հետ զրույցում ասաց քաղաքագետ Լևոն Շիրինյանը`շատ դրական վերաբերմունք արտահայտելով ՀՀ-ում ԱՄՆ-ի դեսպան Միլսիհայտարարությանը, թե որպես դեսպան՝ իր առաջնահերթություններից է բիզնեսի և առևտրային հարաբերությունների զարգացումը երկու երկրների միջև:
«Մեկընդմիշտ պետք է հիշել, որ Ռուսաստանը «մեր պապան չէ», և եթե Հայաստանը Ռուսաստանի հետ լավ հարաբերություններ չունենա, կտուժենք ո´չ միայն մենք, այլև՝ Ռուսաստանն ինքը: Եվ ռուսներն այդ քաղաքականությունը շատ լավ հասկանում են»:
«Եթե մենք ԵՏՄ անդամ ենք ինչ-ինչ հանգամանքների բերումով, ռուսական համակարգի մաս ենք, դա դեռ չի նշանակում, որ մեր արմատներից պետք է կտրվենք, իսկ մեր արմատները մշակութային և քաղաքակրթական իմաստով Արևմուտքում են: Մենք արևմտյան քաղաքակրթություն ստեղծած ժողովուրդներից մեկն ենք, երակներից մեկն ենք, և բնական է, որ պետք է համագործակցենք»,-հայտարարեց քաղաքագետը:
Լևոն Շիրինյանը հնացած, ավելին` տգիտության վերջին դրսևորում է համարում կողմնորոշումների քաղաքականությունը՝ ռուսական, թուրքական , ամերիկյան և այլն:
Նա հավելեց, որ Հայաստանը պետք է անպայման աջակցություն ստանա Արևմուտքից, և կարծիք հայտնեց, որ ամերիկյան կառավարության այս առաջարկները գալիս են ԱՄՆ-ի`Թուրքիային հավասարակշռելու քաղաքականությունից, որպես դրա բաղադրիչ մաս:
«ԱՄՆ-ը, անկախ նրանից՝ ճանաչո՞ւմ է Հայոց ցեղասպանությունը, թե՞ ոչ, զսպում է Թուրքիային Հայաստանի հետ իր կատաղության նոպաների, նացիոնալիզմի ու ֆաշիզմի մեջ` նաև տնտեսական աջակցության այս առաջարկով»,-նշեց քաղաքագետը:
Հիշեցնենք, որ դեսպան Միլսը հայտարարել էր, որ եթե հայկական ու ամերիկյան բիզնեսները միմյանց մասին իմանան ավելին, հնարավոր կլինի խորացնել երկկողմ կապերը, տնտեսական հնարավորությունները, և որ տնտեսական հարաբերությունների ընդլայնումը հնարավորություն կտա ավելի շատ աշխատատեղեր ստեղծել երկու երկրներում:
Լևոն Շիրինյանը կարծում է, որ սա արվում է նաև ԱՄՆ-ում հայկական համայնքի ու լոբբի ջանքերով:
Որպես ամփոփում՝ նա նշեց, որ նման առաջարկը պետք է գործածել «խելքով», ոչ թե ելնելով ինչ-որ կորպորատիվ շահերից, այն է`«օլիգարխ հարստացնելու»:
