«Պայքար Օլիգարխիայի Դեմ» ֆեյսբուքյան խումբը խստորեն դատապարտում է Հունգարիայի և Ադրբեջանի միջև գործարքի արդյունքում օգոստոսի 31-ին Ռամիլ Սաֆարովին Ադրբեջան վերադարձնելու և նրան անմիջապես ազատ արձակելու փաստը: Հաշվի առնելով վերջին տարիներին Ադրբեջանի ղեկավարության կողմից հետևողականորեն տարածվող և հասարակության մեջ արմատացած հայատյացության պետական քաղաքականությունը, և մարդասպանին արդեն իսկ հերոսի կոչման արժանացնելու հանգամանքը՝ Սաֆարովի վերադարձի դեպքում նրա ազատության մեջ հայտնվելու ելքը միանգամայն կանխատեսելի էր: Հետևաբար Հունգարիայի ղեկավարության՝ դատապարտված մարդասպանին արտահանձնելու քայլը եղել է կանխամտածված, հանցավոր համագործակցություն հայատյաց Ադրբեջանի հետ:
Իրադարձությունների այսպիս զարգացումը կրկին անգամ գալիս է ապացուցելու, որ Ադրբեջանի ագրեսիվ կեցվածքը և պետական քաղաքականությունը տրամաբանորեն հակասում են Ղարաբաղյան հակամարտության լուծման միջազգային գործընթացին: Ավելին, Ադրբեջանի ռազմատենչ, հակահայ-քսենոֆոբիկ քաղաքականությունը հակասում է մարդու իրավունքների միջազգային ամենահիմնարար սկզբունքներին: Միևնույն ժամանակ Եվրոպական Միության անդամ Հունգարիայի հանցավոր համագործակցությունը Ադրբեջանի հետ կասկածի տակ է դնում թե ԵԱՀԽ անկողմնակալությունը Ղարաբաղյան գործընթացում, և թե բանակցային գործընթացի արդյունավետությունը:
Արտահանձնմանը հաջորդող երկու շաբաթների ընթացքում միջազգային համայնքի արձագանքը Արբեջանի քայլերը դատապարտելուց այն կողմ չի անցել: Բոլոր հիմքերը կան ենթադրելու, որ Հայաստանի և Արցախի նկատմամբ ձևավորված նույնիսկ այսպիսի խիստ վտանգավոր հանգամանքներում միջազգային համայնքը պատրաստ չէ հստակ և արդյունավետ քայլեր ձեռնարկել: Այսպիսի պայմաններում ԵԱՀԽ Մինսկի խմբի Ղարաբաղյան հակամարտության լուծման ջանքերը դատապարտված են, և սաֆարովյան իրադարձություններն այդ ձախողված գործընթացը բերել են իր տրամաբանական ավարտին:
Հաշվի առնելով ձևավորված նոր, հայ ազգի և հայկական պետականության համար անբարենպաստ հանգամանքները՝ ՀՀ իշխանություններին կոչ ենք անում՝
1. Ամիջապես ճանաչել Լեռնային Ղարաբաղի Հանրապետության անկախությունը և կասեցնել ԵԱՀԽ Մինսկի խմբի գործընթացին ՀՀ մասնակցությունը:
2. Ղարաբաղյան հակամարտության խնդիրը համարել լուծված և ծավալել ԼՂՀ անկախությունը միջազգային հանրության կողմից ճանաչելուն ուղղված քաղաքականություն:
3. ԼՂՀ անկախությունը միջազգային հանրության կողմից ճանաչելու գործընթացին ներգրավել սփյուռքահայ համայնքներին և հասարակական-քաղաքական կազմակերպություններին:
4. Միջազգային դիվանագիտական ասպարեզում նախապատրաստական աշխատանքներ ձեռնարկել ԼՂՀ-ի միավորումը Հայաստանի Հանրապետության հետ կայացնելու նպատակով, որպես նրա ամբողջական և անբաժանելի մաս, և որպես ղարաբաղյան խնդրի հանգուցալուծման միակ վերջնական տարբերակ:
Սեպտեմբերի 16, 2012 թ.
«Պայքար Օլիգարխիայի Դեմ» ֆեյսբուքյան խումբ
https://www.facebook.com/groups/244791745625545/
