Նախորդ անգամ մենք Ձեզ ներկայացրել էինք «Միսս Ական» գեղեցկության մրցույթը, իսկ այսօր ցանկանում ենք անդրադառնալ «Միսս Հավ» մրցույթին:
Սինգապուրցի լուսանկարիչ Էռնեստ Գոհը ճանապարհորդում էր Մալազիայով՝ այնտեղ գյուղական կյանքի մասին ֆոտոնախագիծ իրականացնելու համար: Իր ճանապարհորդության ընթացքում նա մի շատ տարօրինակ գեղեցկության մրցույթի ականատեսը դարձավ: Բանից պարզվում է, որ Մալազիայում անցկացվում է հավերի գեղեցկության մրցույթ: Մրցույթին կարող են մասնակցել միայն «այամ սերամա» տեսակի հավերը: «Այամ սերամա» տեսակի հավը համարվում է աշխարհի ամենափոքր հավը: Գոհը սկսեց ճանապարհորդել Մալազիայի տարբեր գյուղերում, որոնցում շաբաթը մեկ անգամ իրականացվում են հավերի գեղեցկության մրցույթներ: Նա առիթն օգտագործեց իր ֆոտոշարքը հարստացնելու համար:
Վերջին տարիներին ավելի շատ են սկսել բազմացնել «սերամա» տեսակի հավերին: Հավերի գեղեցկության մրցույթներ սկսել են անցկացվել նաև Ինդոնեզիայում, Թայլանդում, Բրիտանիայում և Ֆրանսիայում: Մալազիայում անցկացվող հավերի գեղեցկության մրցույթների ժամանակ թռչնաբույծները ժյուրիին մեկ առ մեկ ներկայացնում են իրենց հավերին: Ժյուրիի անդամները մանրակրկիտ ուսումնասիրում են հավերին: Հաղթողին ընտրելու որոշակի չափանիշներ կան, օրինակ՝ առատ փետուրները, վառ գույները և այլն:
Սերամաները մնացած հավերից առանձնանում են կանգնելու իրենց դիրքով: Նրանք սովորաբար շատ բարձր են պահում իրենց գլուխները և ցած են պահում թևերը: Այս խրոխտ հավերը հաճախ կատակով անվանվում են «մարտի պատրաստ զինվորներ»: Գեղեցկության մրցույթում հաղթելու մեծ շանսեր ունեցող թռչունները բավականին թանկ են վաճառվում: Դրանց գինը կարող է հասնել 10.000 դոլարի: Եթե այսպես շարունակվի՝ հավը շուտով գեղեցկության նոր խորհրդանիշ կհռչակվի:
