Միացո՛ւմ
Քառյակի կողմից ներկայացված 12 պահանջների ևս մեկ՝ շատ կարևոր նշանակություն. հրապարակված փաստաթուղթը, կարելի է ասել, հանդիսանում է հասարակական համախմբման կոչ և քայլ՝ հակառեժիմիական լայն ճակատ ձևավորելու ուղղությամբ։ Այլ կերպ ասած՝ հասարակությանը հուզող ամենասուր հարցերի մեկ փաթեթի մեջ ընդգրկելը ստեղծում է քաղաքականի և քաղաքացիականի համագործակցությունը, փոխլրացումը նոր, ավելի բարձր, ավելի արդյունավետ աստիճանի տեղափոխելու իրական հնարավորություն։
Սա հենց այն է, ինչի մասին դեռ մարտի 1-ի հանրահավաքում խոսեց նախագահ Լևոն Տեր-Պետրոսյանը՝ կարևորելով քաղաքացիական և քաղաքական շարժումների արհեստածին հակադրման մերժումը, նրանց համագործակցության խորացման անհրաժեշտությունը։ Եվ այսօր արդեն քաղաքական ուժերը գործնական քայլ են իրականացնում այս ուղղությամբ:
Քառյակը՝ իշխանություններին ներկայացված իր պահանջագրում, մյուս հարցերի հետ մեկտեղ ներառում է նաև բոլոր այն հարցերը, որոնցից յուրաքանչյուրն արդեն այս կամ այն կերպ բարձրաձայնվել է առանձին քաղաքացիական շարժումների կողմից։ Այս քայլով Կոնգրեսը, ԲՀԿ-ն, ՀՅԴ-ն, Ժառանգությունը ցույց են տալիս, որ պատրաստ են դառնալ քաղաքացիների այս խնդիրները լուծելու գործիքը։
Կարելի է ասել, որ 12 պահանջների «պատվիրատուներից» են նաև տվյալ խնդիրների պահանջատեր հանդիսացող քաղաքացիական շարժումները։ Հետևաբար, վերջիններիս կողմից առնվազն միամտություն և անհեռատեսություն կլինի այս հնարավորությունից չօգտվելը և սեփական ուժերով այս գործընթացը տրամաբանական ավարտին հասցնելուն չմիանալը։ Առավել անընդունելի են այս գործընթացը մերժելու կամ արժեզրկելու փորձերը, ինչն առաջին հերթին հանդիսանում է քաղաքացիական շարժումների պայքարի արդյունքի մերժում ու արժեզրկում։
Անհրաժեշտ է գիտակցել, որ անգամ եթե մեզ հետաքրքրում է միայն մեկ հարցի լուծում, մենք, միևնույնն է, պետք է ձգտենք համախմբման և ուժերի համադրման, քանի որ ընդհանուր ու փոխլրացնող պայքարը կտասնապատկի ու կհարյուրապատկի թեկուզ առանձին մեկ հարցով հաջողության հասնելու մեր հնարավորությունները։
Եվ իսկապես, բացառապես իշխանություններին ձեռնտու այս հակադրության վերջին մնացորդները վերացնելու ժամանական է։ Մեզ այժմ հարկավոր է համախմբում։ Սեպտեմբերը սարերի ետևում չէ, իսկ իշխանության ղեկին հայտնված Սերժ Սարգսյանի ավազակախումբը կզիջի և կհեռանա միմիայն միասնական՝ համաժողովրդական գործողությունների արդյունքում։
