Lurer.com-ը գրում է․
Ռուսաստանը ՄԱԿ-ի Անվտանգության խորհրդի նիստում կբարձրացնի ՌԴ ԶՈւ ռադիացիոն, քիմիական և կենսաբանական պաշտպանության զորքերի ղեկավար, գեներալ-լեյտենանտ Իգոր Կիրիլովի սպանության հարցը։ ՌԻԱ Նովոստիի փոխանցմամբ՝ այս մասին Telegram ալիքում հայտարարել է համաշխարհային կազմակերպությունում մշտական ներկայացուցչի առաջին տեղակալ Դմիտրի Պոլյանսկին։
«Մենք անպայման կբարձրացնենք Իգոր Կիրիլովի դեմ ահաբեկչության հարցը ՄԱԿ-ի Անվտանգության խորհրդի նիստում, որը մենք խնդրել էինք դեկտեմբերի 20-ին՝ Ուկրաինային արևմտյան զենքի մատակարարման և ճգնաժամի խաղաղ կարգավորման հեռանկարների վրա դրանց ազդեցության վերաբերյալ»,- ասել է նա։ .
Ինչպես ընդգծել է դիվանագետը, այս հանցագործության մեղավորները պետք է արժանի պատիժ կրեն և դատապարտվեն միջազգային հանրության կողմից։
Կիրիլովը և նրա օգնական Իլյա Պոլիկարպովը մահացել են Մոսկվայի Ռյազանսկի պողոտայի բնակելի շենքի բակում տեղի ունեցած պայթյունի հետևանքով։ Միջադեպը տեղի է ունեցել երեքշաբթի առավոտյան ժամը վեցի սահմաններում։ Նախնական տվյալներով՝ ռումբը պայթել է մուտքի մոտ կանգնած սկուտերի մեջ։
